DONOSTIA, 18 (EUROPA PRESS)
Donostiako Udalak Gazteria Zerbitzuaren bitartez eta Donostia Kultura erakundearen laguntzarekin 1988/89 ikasturtetik antolatzen duen Gazteen Antzerki Topaketa maiatzaren 24an hasi eta ekainaren 16an bukatuko da, eta 150 gazte bilduko ditu. Sari banaketa ekainaren 21ean izango da, Lugaritz Kultur Etxean.
Aurkezpenean azaldu dutenez, hasieratik, ekimenaren helburua 14 eta 30 urte bitarteko hiriko gazteen antzerki talde ez profesionalak sustatzea eta euren lana ezagutzera ematea izan da. Horretarako, aurreko urteetan bezala, parte hartzaileei aukera eskaintzen zaie antzezlanak modu profesionalean taularatzeko, hirian ezagunak eta egokiak diren agertokietan.
"Topaketak aukera paregabea dira parte hartzen duten gazteek beraien kultur ekoizpenen sormen eta difusio prozesuetan aurrera egiteko. Topaketaren bidez, esperientzia positibo, atsegin eta hezitzaile bat eskaini nahi da, parte hartzaileen gaitasun sortzaile eta artistikoa elementu motibatzaile bihurtuz", adierazi dute.
Parte hartuko duten taldeak ondoko hauek izango dira: Donostiako Binahi antzerki eskola (bi talde), Zurriola antzerki eskola (bi talde), Santo Tomas Lizeoa (bi talde), Deustuko Unibertsitateko La Rata India Antzerki Laborategia eta AtenASP; Pasaiako Hamaika Buelta; Bilboko Trikiñuela (Deustuko Unibertsitatea); Oiartzuneko Txiribuelta eta Santzak antzerki taldeak.
Donostia Kulturaren lankidetzari esker, Lugaritz eta Egia kultur etxeetako eta Antzoki Zaharreko agertokiak erabili ahal izango dira antzezlan guztiak aurkezteko. Gainera, Kontadores Gazte Zentroa erabilgarri egon da talde parte hartzaileek, sorkuntza eta entsegu prozesuak egin ditzaten. Hainbat taldek haien lanak bertan entseatu dituzte, eta han egin dituzte ere antzezlanen lehen emanaldiaren aurrekoa.
