DONOSTIA, 10 (EUROPA PRESS)
Donostitruk Donostiako bigarren eskuko merkatua egingo da larunbat honetan, uztailaren 11ean. Ohiko moduan, Donostitruk Suhiltzaileen egoitza izandako Donostia 2016 gunean egingo da, Easo kaleko 43an, eta arropa, osagarriak, liburuak, CDak eta jostailuak salduko dituzten 30 postu egongo dira, 10:00etatik 14:00etara. Postu horietatik zortzi elkarteenak izango dira.
Donostiako Udalak adierazi duenez, hil batetik bestera "gero eta jende gehiagok nahi du bigarren eskuko merkatu honetan parte hartu". Horrela, eskaera kopurua "nabarmen" ari da igotzen, bai salmenta postua erreserbatzeko, bai posturik gabe gauzak saltzeko. Lehentasuna elkarteei ematen zaie, eta ondoren partikular donostiarrei.
Saldu beharrekoak antolatzaileen postura gerturatu behar dira merkatuaren egunean goizeko 09:30etik 10:00etara. Bertan, zerrenda egin eta prezioa jarri ondoren, utzi egiten dira, eta, merkatua amaitzean, saldutakoaren etekina eta saldu gabekoa jasotzea itzuli beharra dago.
Antolatzaileak postuan dituzten gauzak zaindu arren, zerbait faltako balitz, edo matxuratuko balitz, Donostitruk ez litzateke hauetaz arduratuko. Onartuko diren gauzak, lau sekziotan bana daitezke: liburuak, musika-zinema, jokoak-jostailuak eta dekorazio artikuluak (tamaina txikikoak).
Donostiako Udalak www.donostitruk.eus web orria du informazioa errazteko eta salmenta postuen eskakizunak egiteko. Interesa duenak merkatu bakoitzerako egin behar du eskakizun berri bat.
Produktuak berrerabiltzeko helburua dauka Donostitruk azokak, zabortegian bukatuko zuten liburu edo jostailuak berriro agertzen baitira merkatuan. Horrekin zabor gutxiago sortzea, elaborazio prozesuan lehengai gutxiago erabiltzea eta elaborazio horretan kutsadura gutxiago sortzea lortzen da.
