BILBO, 13 (EUROPA PRESS)
Euskal Autonomia Erkidegoko (EAE) egoera politikoaren balorazioa positiboa da lehen aldiz 2007. urtetik. Hain zuzen, egoera politikoa oso ona edo ona dela uste du pertsonen %54k, eta txarra edo oso txarra dela %36k. Egoera politikoaren balantze positibo hau ez zen 2007tik ematen, Eusko Jaurlaritzako Lehendakaritzaren 64. Euskal Soziometroaren datuen arabera.
Oro har, Araba, Bizkai eta Gipuzkoako herritarrek egoera orokorraren balorazio positiboa egiten dute. Euren bizitzarekin oso (%28) edo nahiko (%56) pozik daude, eta Euskadiko egoera ekonomikoari (%64rentzat ona edo oso ona) eta politikoari (%54rentzat ona edo oso ona) dagozkion balorazioak ere positiboak dira.
EAEko arazo nagusien artean lan merkatuari lotutako arazoak aipatu dituzte berriz ere gainerakoak baino askoz gehiago (%72k hiru arazo nagusien artean aipatu ditu). Bigarren lekuan arazo ekonomikoak aipatu dira gehien (%14), eta ondoren egoera politikoa eta etxebizitza eta etxe gabetzeak (%11na), eta zerbitzu publikoen funtzionamendua eta hedadura eta laguntzak eta osasungintza (%8na).
ALDERDIAK ETA BURUZAGIAK
Bestalde, EAJ da berriz ere begikotasun handiena eragiten duen alderdia (0tik 10erako eskalan, 4,6), eta ondoren datoz Elkarrekin Podemos (3,5), EH Bildu (3,4), PSE-EE (3,2) eta PP (1,5). Alderdi guztien balorazioak, PPrenak izan ezik, hamarren batzuk jaitsi dira aurreko soziometroarekiko.
Buruzagi politikoen balorazioari dagokionez, Iñigo Urkullu Jaurlaritzako lehendakaria da 5etik gorako puntuazioa lortu duen bakarra (5,3). Atzetik doaz EAJko Andoni Ortuzar (4,6), EH Bilduko Arnaldo Otegi (3,8), PSE-EEko Idoia Mendia (3,7), Podemos Euskadiko Nagua Alba (3,7) eta PPko Alfonso Alonso (2,1). Guztien balorazioek behera egin dute apur bat, Nagua Albarenak izan ezik, hamarren bat igo baita.
Hala alderdiak nola buruzagiak 2014tik ohiko eta egonkor diren baloreetara itzuli dira oro har. Otsaileko azken soziometroan balorazio guztiak igo ziren, eta bost hauteskunde prozesu jarraian jaso zituen hiru urteko epe baten lehen inkesta izateak azaldu lezake hori.
