BILBO, 8 (EUROPA PRESS)
Euskal Autonomia Erkidegoko (EAE) 30 urtetik beherako gazteen %49 ez da europar sentitzen, %45 "oso edo nahiko europar" sentitzen den bitartean. Europar sentitzen direnen portzentajea igo egin da 2016an, 2012an hautemandako beherakadaren ondoren.
Sentimendu europarraren beherakada krisiaren ondorioz Europak ezarritako politika ekonomikoen kontra agertzearekin etorri zen, eta orain, 2000. urtean hasitako seriearen punturik altuenean kokatu da. Eusko Jaurlaritzako Enpleguko eta Gizarte Politiketako Saileko Gazteen Euskal Behatokiaren datuak dira. Europako Eguna dela-eta (maiatzak 9), EAEko gazteen artean europar sentimenduaren hedapenari buruzko datuak plazaratu ditu Gazteen Euskal Behatokiak.
Horretarako, Araba, Bizkai eta Gipuzkoako 15 eta 29 urte bitarteko 1.500 gazteri zenbateraino sentitzen diren europarrak galdetu zaie. Galdera Gazteen Euskal Behatokiaren hainbat inkestatan errepikatu da, azkena 2016ko lehen hiruhilekoan eginikoan, "Euskadiko gazteak" bildumaren barruan. Bertan emandako erantzunak hartu dira oinarri.
Horrela, 2016ko emaitzak ikusita, EAEko gazteen erdia baino gutxixeago (%45) sentitzen da "oso edo nahiko europar", baina oraindik gehixeago dira europarrak sentitzen ez direnak (%49). Gainerako %6k ez du iritzirik azaldu, Ander Añibarro Jaurlaritzako Enpleguko eta Gizarte Politiketako Saileko Gazteriako zuzendariak azaldu duenez.
Bere burua "oso edo nahikoa europartzat" jotzen duten 30 urtetik beherako gazteen ehunekoak gora egin du 2016an, 2012ko jaitsiera izan ondoren (orduan krisialdi ekonomikoaren ondorioz Europak ezarritako politika ekonomikoen kontra ageri zen biztanleria), eta orain 2000n hasitako seriearen punturik altuenean kokatzen da gazteen europar sentimendua.
Europar Batasunarekiko konfiantzari dagokionez, 2016an 18 eta 29 urte bitarteko gazteen %47k konfiantza zutela adierazi zuten, EAEko 18 urtetik gorako biztanleriaren batez bestekoaren gainetik (%39). Gainera, adin horretako gazteen %43ren ustez, Europar Batasuneko kide izatea "gauza ona da". Kasu honetan gazteen eta 18 urtetik gorako biztanleria orokorraren iritziak antzekoak dira (biztanleria orokorrean %45ek uste du hori).
Europar Batasunarekiko konfiantzari eta Europar Batasuneko kide izatearen balorazio positiboari buruzko datuak Lehendakaritzako Prospekzio Soziologikoen Kabineteak 2016an argitaratutako txostenetatik datoz, Euskal Soziometroak 60 eta 61, hain zuzen.
