BILBO, 30 (EUROPA PRESS)
Euskal Autonomia Erkidegoko (EAE) ostalaritza sektoreak (ostatu emate eta jaki eta edarien zerbitzua) 5.264 milioi euro fakturatu zituen 2013an, hau da, aurreko urtean baino %2,3 gehiago, Eustaten jasotako datuen arabera.
Enpleguari dagokionez, 872 pertsona gehiago aritu ziren lanean 2013an, eta horrek esan nahi du 53.295 pertsonak egin zutela lan 2013an, hau da, %1,7ko igoera gertatu zela. Hala ere, osotasunean, 60 establezimendu garbi baino pixka bat gehiago galdu ziren (%0,4), eta horrela, 14.088 zeuden martxan.
Jaki eta edarien atala -jatetxeak, bestelako jaki zerbitzuak eta edari establezimenduak barne hartzen ditu- izan zen garrantzitsuena 2013an, fakturazio bolumenari dagokionez, %88,4koa izan baitzen, eta bilakaera onena ere izan zuen: fakturazioa %2,7 eta enplegua %2,5 igo ziren.
Aitzitik, ostatu zerbitzuen atalak -hotelak eta bestelako ostatu zerbitzuak azpiatalak barne hartzen ditu- negozio zifra osoaren %11,6 bereganatu zuen eta bilakaera negatiboa izan zuen: negozio zifran jaitsiera txiki bat izan zuen (%-0,5) eta enplegua %4,6 jaitsi
zen.
Maila zehatzagoan, jaki eta edarien atalaren barruan, jatetxeen jarduera izan zen garrantzitsua: fakturazioa kopuru osoaren %44,1 izan zuen, eta enpleguaren %41. Hala, bere negozio zifra %3,5 hobetu zuen aurreko urtearekin alderatuta eta enplegua %0,3 handitu zen.
Edari establezimenduen azpisektoreak aurreko urtean baino pisu pixka bat txikiagoa izan zuen 2013an: fakturazioa %2,2 txikitu zuen, baina enpleguan igoera txiki bat izan zuen, %0,7koa. Azkenik, atal honetan, bestelako jaki zerbitzuen azpiatalaren bilakaera nabarmendu zen -cateringa barne hartzen du, besteak beste-; negozio zifra %12,6 eta enplegua %19,8 bakarrik baldin badira ere, azken honetan hazkunde
adierazgarria izan du (%11,6), baita negozio zifran ere (%20,3).
Ostatu zerbitzuen kasuan, hotelen azpisektoreak enpleguaren %5,8 galdu zuen, eta negozio zifra % 1,4 murriztu. Hala, negozio zifra osoaren %81,5 bereganatu zuen, eta atal horretako enpleguaren % 77,8. Aldiz, bestelako ostatuen azpisektorearen negozio zifra %3,6 handitu zen, baina enplegatutako jende kopuruan ez zen aldaketa nabarmenik izan (%0,1).
LURRALDEAK
Lurraldeka, sektore osoa kontuan hartuta, 2013an, fakturazioan Euskal Autonomia Erkidegoko hiru lurraldeek bilakaera positiboa izan zuten, eta, Bizkaia kenduta, enpleguan ere bai.
Fakturazioari dagokionez, Gipuzkoan, non EAEko salmenta guztien %35 egin baitziren, salmentek %2,5 eta enpleguak %4,8 egin zuten gora. Araban, enpleguaren hazkundea %2,9koa izan zen, eta fakturazioarena %1,6koa, salerosketen kopuru osoaren %14 bereganatuz. Bizkaian, ostalaritza sektorearen fakturazioa 2012an baino %2,4 handiagoa izan zen, guztizko salmenten % 51 bereganatuz, baina langileen kopurua %0,7 murriztu zen.
Ostalaritza sektoreko establezimenduen neurria aztertuz gero, 2013an, establezimenduen %94,7 mikroenpresak (hamar langiletik behera) ziren. Mikroenpresa horiek fakturazio guztiaren %64,8 sortu zuten, eta landunen %59,3 jardun ziren haietan. Enpresa txikiak (10-49 pertsona landun) establezimenduen %5,1 ziren, enpleguen %22,8 zegozkien eta %23,6 fakturatu zuten.
Azkenik, 50 langileko edo gehiagoko enpresek (enpresa ertain eta handiek) guztizkoaren %11,6 fakturatu zuten eta landunen %17,9ri
eman zioten enplegua. Establezimenduen %0,2 ordezkatu zuen talde honek.
