GASTEIZ, 22 (EUROPA PRESS)
Euskararen Gaitasun Agiria (EGA) lortzeko azterketen orientazioa eta edukiak aztertzeko eskatu du ostegun honetan Eusko Legebiltzarrak, adituek dagozkion "hobekuntzak" proposa ditzaten azterketa euskal errealitate soziolinguistikora "modu iraunkorrean egokitzeko".
PSE-EEk eraman du gaiari buruzko eztabaida Gasteizko Ganberara, joan den ikasturtean EGA lortzeko azterketetara aurkeztu ziren guztien %26,48k besterik ez zituelako frogak gainditu.
Egoera hori ikusita, Eusko Legebiltzarreko talde politiko guztiek eskatu diote Jaurlaritzari 297/2010 Dekretuak aurreikusten duen Baliozkotzeen Jarraipenerako Batzordeak lau hilabeteko epean egungo frogen orientazioa eta edukiak aztertzea, Euskararen Sustapenerako Ekintza Planak (ESEP) eta Euskararen 2013-2016 aldirako Agenda Estrategikoak diotena kontuan hartuz.
EGA zein euskararen ezagutza aitortzeko dauden beste froga ofizial guztiak aztertzeko, emaitzak baloratzeko eta emaitza horien zergatiak aztertzeko eskatu dute Legebiltzarreko taldeek, eta horretarako, aipaturiko dekretuko 7,5 artikuluak aurreikusten duen moduan, esparru ezberdinetako adituak erabiltzeko eskatu dute.
Frogak euskal errealitate soziolinguistikoan eta dituen betebeharretan "egokitzapen iraunkorra" ziurtatzeko eta "euskararen gizarte zabalkundea errazteko" egoki irizten dituen hobekuntzak proposatuko ditu Baliozkotzeen Jarraipenerako Batzordeak. Proposamenak eta ondorioak Legebiltzarrak jakinaraziko ditu.
