BILBO, 23 (EUROPA PRESS)
Euskal Herriko Unibertsitateko (EHU) 75 tituludunek praktika profesionalak egingo dituzte Europako enpresetan, prestakuntza osatze aldera, EPEZ beken hamargarren edizioaren bidez. Asteazkenean, otsailaren 24an, prestakuntza bilera bat egingo da Ekonomia eta Enpresa Zientzien Fakultateko Zubiria Etxean, Bilbon, Europako hainbat hiriburutan kokatutako enpresetan prestakuntza osatuko duten EHUko tituludun horiekin.
EHUk jakinarazi duenez, beka hauen helburua, lan merkatuari arrakastaz aurre egin ahal izateko behar diren gaitasunak garatuz ikasleen perspektiba profesionalak hobetzea da. Bekadunek atzerriko egonaldiaren kostu nagusiak finantzatuta izango dituzte: bidaiak, aseguruak, prestakuntza, ostatua, gestioa eta antolakuntza. Edizio honetan, Erresuma Batuko, Irlandako, Austriako, Txekiar Errepublikako eta Italiako enpresetan burutuko dira lan praktikak, besteak beste.
Egonaldiak 12 astekoak izango dira eta martxoa eta ekaina bitartean egingo dira. Martxoaren 2rako programatu dira lehenengo irteerak.
Parte hartzaileak enpresa batean hasiko dira lanean unibertsitatean ikasi duten guztia praktikan jarriz. Gainera, enpresek haien esku jarriko duten tutore baten aholkularitza ere izango dute.
Halaber, hasieran zein bukaeran azterketa bat egin beharko dute abegi herrialdeko hizkuntza ezagutzaren aurrerapenak ezagutzeko. Ildo horretan, egonaldian zehar hizkuntzaren hobekuntza on line ikastaroak burutuko dituzte.
