EHUko Zientzia eta Teknologia Fakultateak lipidoen arloko Europako biltzarrik garrantzitsuena antolatuko du

BILBO 3 Sep. (EUROPA PRESS) -

Euskal Herriko Unibertsitateko (EHU) Zientzia eta Teknologia Fakultateak '51st International Conference on the Bioscience of Lipids' delako lipidoen arloko biltzarra antolatu du AlhondigaBilbao zentroan. Aipatu Fakultateko Biokimika eta Biologia Molekularra Saileko irakasleak diren Felix Goñi eta Antonio Gomez-Muñoz dira antolatzaileak, eta topaketa irailaren 7tik 11ra izango da, Alhondiga Conference Center guneko instalazioetan.

Antolatzaileek gaur jakinarazi dutenez, biltzarraren gaia "Lipidoen urrezko aldia: 50 urte baino gehiago lipopozez beteta" izango da, eta funtsean, lipidoak molekula biologiko erabakigarritzat dituzten gaiak landuko dira, esaterako, mintz biologikoen egitura eta eginkizuna, giza metabolismoaren erregulazioa edo zelula komunikazioa.

Alemania, Argentina, Belgika, Kanada, Espainia, Amerikako Estatu Batuak, Frantzia, Israel, Japonia, Herbehereak, Portugal, Erresuma Batua eta Suitzako goi mailako zientzialariak egongo dira lipidoen biozientzian interesa duten hainbat diziplinatako ikertzaileei zuzendutako biltzar honetako hizlarien artean.

Biltzarra zazpi sinposiok osatuko dute, ikerketa arlo honetako zientzialari ospetsuenek aurkeztutako osoko hitzaldiekin eta ahozko hainbat aurkezpenekin. 'Poster saioak' ere izango dira, baita zientzialariek biltzarreko gai ezberdinak eztabaidatzeko aukerak ere.