BILBO, 6 (EUROPA PRESS)
Ander Añibarro Eusko Jaurlaritzako Gazteriako zuzendaria Loiuko aireportuan izan da ostegun honetan, 38 gazteri agur esateko. Gazte hauek lankidetza lanak egingo dituzte uda honetan hiru hilabetez Erdialdeko Amerikan, batez ere. Guztira ehun dira era honetako ekintzetan parte hartuko duten euskal gazteak uda honetan mundu osoan, bereziki Asia, Hego Amerika eta Afrikan.
"Jada 50 euskal gazte ditugu mundutik zehar banatuta eta hurrengo astean zehar beste horrenbeste irtengo dira. Orotara ehun dira uda honetan lankidetza lanetan arituko direnak mundu osora Euskadiren izena hedatuz", Añibarrok adierazi duenez.
Ehun pertsona hauek 2017ko Euskadiko Gazteak Lankidetzan programan parte hartuko dute. Programak 25 urte bete ditu, eta Euskadiko gazteak hegoaldeko herrialdeetan garapenerako lankidetzan jarduteko ekintzetan sentsibilizatzea eta euskal gazteetan herrien eta gizarteen arteko elkartasunaren kultura sustatzea da bere helburua.
Garapenerako gobernuz kanpoko euskal erakundeetako ordezkariek eratzen duten epaimahaiak aukeratu ditu ehun gazteak. Hautatuek kooperante gisa biziko duten esperientziarako informazioa eta orientazioa dute. Programaren gastuak Jaurlaritzaren Enplegu eta Gizarte Politiketako Sailaren mendeko Gazteria Zuzendaritzaren eta Garapenerako Lankidetzaren Euskal Agentziaren kontura izango dira.
