BILBO, 22 (EUROPA PRESS)
Bizkaiko Foru Liburutegiak askotariko kultur programazioa eskainiko du 2018. urtean, eta erakusketak, ikastaroak, tailerrak, irakurketa taldeak, hitzaldiak eta lehiaketak antolatuko ditu, besteak beste. Lorea Bilbao Bizkaiko Aldundiko Euskara eta Kulturako diputatuak aurkeztu du astelehen honetan foru liburutegiaren urteko egitaraua. Bere hitzetan, liburutegia "bizirik dagoen espazio bat da, eta irakurmena sustatzea da funtsezkoena".
Foru liburutegiaren jarduerak 2008. urtean antolatu ziren lehenengoz, eta, hamar urte igarota, "askotariko kultur programazioa gero eta zabalagoa da". Horrela, azken hamarkadan 41.849 pertsonak parte hartu dute Bilbon dagoen bibliotekan antolaturiko jardueretan.
Modu honetan, urteko kultur programazioan lau erakusketa izango dira: Jesus Mari Arruabarrenaren "Muga" argazki erakusketa, martxoaren 15etik apirilaren 30era; "Videre Discere Est" medikuntza, zoologia eta botanikari buruzko liburu grafikoen bilduma, ekainaren 11tik uztailaren 21era; Juanje Sanz komisario izango duen edizio esperimentalen metakontakizun bat, irailaren 17tik urriaren 31ra, eta, urtea bukatzeko, "Euskal Mitologia" hirugarren erakusketa.
Halaber, Bizkaiko Foru Liburutegiak 11 ikastaro eta tailer antolatuko ditu. Orain arte izan den prestakuntza eskaintzarik handiena da, eta guztira, 152 ordu izango dira, 2017an baino 52 gehiago. Ia ordu horien erdia euskarazko jarduerak egiteko erabiliko dira (aurreko urtean baino %8 gehiago).
Gainera, irakurtzeko zaletasuna sustatzeko asmoz, irakurtzeko lau talde egingo dira: bi euskaraz eta bi gaztelaniaz. Taldeek 120 plaza izango dituzte. Euskararen kasuan, Txani Rodriguezek eta Julen Gabiriak zuzenduko dituzte, eta gaztelaniazkoak, berriz, Aixa de la Cruzek eta Ivan Repilak.
Bestalde, foru liburutegia literatur topaketak egiteko lekua ere izango da. Besteak beste, 2017ko Euskadi Literatura Sarietako bi saridun egongo dira bertan: Arantza Urretabizkaia eta Asier Serrano. Euskaraz bost topaketa ere egingo dira, Ana Malagon, Asier Serrano, Nerea Arrien, Arantza Urretabizkaia eta Anjel Lertxundirekin, eta gaztelaniaz lau, Fernando Marias, Galder Reguera, Aixa de la Cruz eta Txani Rodriguezekin.
HITZALDIAK
Bizkaiko Foru Liburutegiak 17 hitzaldi antolatuko ditu, eta hainbat egun iraungo duten hiru jardunaldi izango dira, azken urteetan ere antolatu direnak: "Irakurleak eraikitzen" (bosgarren edizioa), "LiburuTEKia" (zazpigarren urtez) eta "Letrak eta futbola" (bederatzigarren aldia).
Mahai inguruak, ziklo monografikoak eta aurkezpenak egingo dira, eta hizlarien artean, besteak beste, Rosa Montero, Josune Muñoz, Laura Freixas, Cristina Morato, Carmen Alborch, Ander Izagirre, Oskar Benegas, Galder Izarzugaza, Aitziber Etxeberria, Toti Martinez de Lezea, Gurutze Beitia eta Amaia Arkotxa izango dira.
Azkenik, aurten ere, Bizkaiko Foru Aldundiak bi literatur lehiaketa antolatuko ditu: BizkaIdatz lehiaketaren hamargarren edizioa, Bernardo Atxagaren eta Itziar Minguezen esku hartzearekin, eta BizkaIdatz Txikiaren bosgarren aldia, Nerea Arrienen eta Alvaro Yarrituren lankidetzarekin.
