BILBO, 7 (EUROPA PRESS)
Eroski Fundazioaren "Hazteko energia" Elikadura eta Ohitura Osasungarrien Heziketa Programak Gosasun zigilua asteazken honetan, uztailaren 7an. Innobasque Berrikuntzaren Euskal Agentziak bultzatu du zigilua, ikasleen artean ohitura osasungarriak sustatzeagatik. 2014-2015 ikasturtean estatuko 15 autonomia erkidegotako 930 ikastetxetako Lehen Hezkuntzako 67.000 ikasletik gora aritu dira Eroskik antolatutako tailer teoriko eta praktikoetan.
Eroskiko zuzendari Alejandro Martínez Berriochoak Innobasqueko Txema Villate zuzendari nagusiaren eskutik jaso du Gosasun zigiluaren ziurtagiria Bizkaiko Parke Teknologikoan eginiko ekitaldian. Martinezek adierazi duenaren arabera, "heziketa programa aintzat hartu izanak lan horretan jarraitzera animatzen eta bultzatzen gaitu".
Ikasgelan lantzen diren saio teorikoez gain, hainbat tailer osagarri egiten dira, ikasleek ikasitakoa praktikan jar dezaten. "Ikasleek gure dendetan egiten dituzte tailer praktikoak. Horietan, menu osasungarriak prestatzeko erosketak egiten dituzte. Azken edizioan, 1.200 tailer baino gehiago egin dira 180 saltokitan", esan du Eroski Fundazioko zuzendariak.
Era berean, gogora ekarri du irailean hasiko dela laugarren edizioa, 2015-2016 ikasturtearen hasierarekin bat eginez. Heziketa Programak eduki berriak sartuko ditu ikastetxeetan laugarren edizio honetan. "Jan eta zaindu zure bihotza" eta "Nire lurraldeko produktuak" tailerrak nabarmentzen dira, eta azken honetan adingabeek zuzenean ezagutu ditzakete nekazaritza eta elikagaien ekoizleen instalazioetan euren eskualdeko elikagaien jatorria, eta horrela bertako ekoizpenak duen garrantziaz jabetzea espero da.
