Eskola Antzerki Jaialdia amaituko da igandean Bilboko Arriagan, sarien banaketarekin

BILBO 26 May. (EUROPA PRESS) -

Bilboko Udaleko Kultura eta Hezkuntza Sailak sustatzen duen Eskola Antzerki Jaialdiaren 17. edizioa amaituko da igande honetan, maiatzaren 27an, Arriaga Antzokiko eszenatoki nagusian. Saritutako lanak ikusi ahal izango dira emanaldian, eta sariak ere banatuko dira, Bilboko Udalak jakinarazi duenez.

Aurtengo edizioan sariak lortu dituzten lanak honako hauek dira: Maestra Isabel Gallego Gorria L.H.I.-ko "Ebamirentxu" eta "Ring"; Viuda de Epalza L.H.I.-ko "Denboran bidaiatzen"; Txurdinaga-Behekoa Batxilergoko Institutuko "La posadera"; eta Karmelo Ikastolako "Lore horia". Horrez gain, epaimahaiak accesit bat eman dio Solokoetxeko Karmelo institutuko "Soloko kabareta" lanari.

Bilboko 15 ikastetxe publikok eta pribatuk hartu dute parte lehiaketaren 17. edizio honetan. Euskaraz (21) eta gaztelaniaz (8) egindako 29 antzezlan aurkeztu dira. Eskola Antzerki Jaialdia 1992an sortutako ekimena da, umeen artean Arte Eszenikoak sustatzeko helburuarekin. Diru sariez aparte, parte hartzen duten ikastetxe guztiek 300 euro jasotzen dituzte, ikasturtean zehar prestatu beharreko lanetan laguntzeko.

Lehiaketaren oinarriek berrikuntza garrantzitsuak izan zituzten iazko edizioan. Berrikuntza horien artean azpimarratzekoa da desagertu egin direla adinaren araberako kategoriak (ikas-mailen artean elkarrekin egindako lana bultzatzeko).

Halaber, zenbait alderdi berri saritzen dira orain, besteak beste, lan eszenikorik hoberena, proposamen eszenikorik hoberena, alderdi teknikoei emandako konponbiderik onena, interpretaziorik hoberena, partaideen adinera egindako egokitzapen onena edo modalitate eszenikoen berreskuratze lanik hoberena.

Kategoria bakoitzeko lan irabazleek diploma bat eta 300 euroko diru saria jasoko dute. Horrez gain, euren sorkuntza lana ikus-entzuleen aurrean aurkezteko aukera izango dute, oraingo honetan Arriaga Antzokiak eskaintzen duen eszenatoki bikainean.