DONOSTIA, 21 Feb. (EUROPA PRESS) -
Eudelen Batzorde Agintariak eskaera formala egin dio astearte honetan Gipuzkoako Foru Aldundiari, Martin Garitano diputatu nagusiari gutun bat bidaliz, Finantzen Lurralde Kontseilua ahalik eta azkarren dei dezan.
Helena Franco Ogasun eta Finantzako foru diputatuak komunikabideen bitartez ezagutarazitako planteamenduaren ondoren egin du eskaera hau Eudelek; izan ere, foru diputatuak udalekin komunikazioa izateko talde bat sortzea planteatu du.
Horri dagokionez, Eudelek jakinarazi du foru arautegiak (azaroaren 24ko 16/1994 Foru Araua, 2. artikulua, g) idatz-zatia) sortu duela Finantzen Lurralde Kontseilua eta, era berean, berariaz izendatu duela Foru Administrazioaren eta Toki Erakundeen arteko komunikazio eta koordinaziorako legezko organo.
Era berean, Eudelen arabera, foru arau horren 3. artikuluak ahalmena ematen dio Euskadiko Udalen Elkarteari Kontseiluko kideak izendatzeko. Horren haritik, Eudelek adierazi du asmoa duela hori egiteko, Gipuzkoako ordezkaritza politikoaren irizpideak aintzat hartuta.
Horrela, indarrean dagoen foru arautegia betez, eta, batez ere, foru eta udal erakundeen arteko lankidetza eraginkorrerako bideak bermatzeko asmoz, Eudelen Batzorde Agintariak eskaera egin dio Diputatu Nagusiari ahalik eta azkarren egin dezan aipatutako Kontseilua egiteko deialdia.