Aviso: Esta noticia tiene más de un año. Última actualización: 09/02/2010 13:32
Gemma Zabaleta Enplegu eta Gizarte Gaietako sailburuak proposatuta, Eusko Jaurlaritzako Gobernu Kontseiluak 281,4 milioi euroko gastua baimendu du 2010. urtean Diru-sarrera Bermatzeko Errentaren (DBE) eskaerei erantzun ahal izateko. Horrez gain, Jaurlaritzak 43,1 milioi euro erabiliko ditu Etxebizitzako Gastuak Osatzeko Prestazioa (EGOP) 2010. urtean finantzatzeko. Gaur baimenduriko gastu osoa, beraz, 324,5 milioi eurokoa izango da.
DBE prestazio ekonomikoa da, aldizkakoa, beren gastuei (oinarrizko premiei lotutako gastuei zein gizarteratzeko edo laneratzeko prozesu baten ondorio diren gastuei) aurre egiteko diru-sarrera nahikorik ez daukatenei zuzendua. Pertsona horiek bizikidetza-unitate bateko kideak izan behar dute. Bestalde, DBE osatzeko sortutako prestazioak dira EGOPak, eta prestazio horren titularrek etxebizitzaren edo ohiko bizilekuaren alokairuari lotutako gastuak ordaintzea dute helburu.
Bi kasuetan ardurakidetzaren printzipioa aplikatzen da, hau da, laguntzen hartzaileek, gizarteratze-hitzarmenen bidez, hainbat zeregin bete beharko dituzte, ahalik eta epe laburrenean autonomia ekonomikoa lortze aldera. Eusko Jaurlaritzaren ustez, Euskadi gai horretan "ahalegin ekonomiko gaitza" egiten ari da, baina horrekin batera lan-aktibaziorekin eta prestakuntzarekin konprometitzeko eskatu behar zaie hartzaileei.