BILBO, 1 Feb. (EUROPA PRESS) -
Bilboko Udaleko Euskara Sailak eta Topagunea Euskara Elkarteen Federazioak antolatzen duten "Ikusi eta Ikasi" umeentzako euskarazko ekitaldien programa aurrera doa, eta aste honetan, gurasoei zuzenduriko ipuin kontaketako tailerrak egingo dira, antolatzaileek gaur adierazi dutenez.
Horrela, Tiboli ikastetxean eta Begoña eta Deustoko udaltegietan, Antton Irustak ipuin kontalariak gurasoei zuzendutako ipuin kontaketa tailerra eskainiko du. Bertan, ipuinen eta ahozko adierazpenaren balore hezitzaileak aurkeztuko dira. Tailerraren ordutegiak hauek dira: bihar, Begoñako Udaltegian, 18:00etan; ostegunean, Tiboli ikastetxean, 18:00etan; eta larunbatean, Deusto Bidarte Udaltegian, 11:00etan.
"Ikusi eta Ikasi" ekimen egonkorra da, eta BBKren eta Bizkaiko Foru Aldundiaren babesa dauka. Kultur zirkuituaren helburu nagusia Bilboko haurren artean euskararen erabilera haien aisialdian sustatzea da. Halaber, ekimenak haurren artean bidezko heziketa, parte-hartzea eta sormena bultzatzea bilatzen du.
Ekitaldi honetan, 3 eta 12 urte arteko umeei egokitutako 30 ikuskizun baino gehiago antolatu dira (antzerkia, ipuin kontalariak, txotxongiloak, magia, pailazoak eta abar). Emanaldiak Begoñako eta Deustuko Udaltegietan eta Errekaldeberri, Tiboli, Zamakola eta Zurbarango Ikastetxeetan egingo dira, martxoaren 13ra arte. Bestalde, bi gune berri dira aurtengo zirkuituan: El Karmen Aretoa eta San Frantziskoko Udaltegia.
