ONITSHA (NIGERIA), 1 Jul. (Reuters/EP) -
Bost polizia kiskalita hil ziren atzo Nigeriako hego-ekialdean armaturiko gizon batzuek egindako bahiketa saiakera batean. Hildakoak konboi batean zihoazen langile atzerritarren talde batekin, Poliziak gaur jakinarazi duenez. Hildako agenteak tiroka aritu ziren armaturiko gizonekin langileak Aba hirian (Aiba estatua) kokaturiko botilaratzaile konpainiako bulegoetara zeramatzaten bitartean.
"Bahitzaileen taldeak segada jarri zieten (...). Bahitzaileak tiroka hasi ziren bi ibilgailuren kontra eta sutan jarri zituzten, ibilgailuetako batean zihoazen bost poliziak bizirik errez", azaldu du Abayomi Ladipo Poliziaren komandanteak. Oraingoz Poliziak ez du atxiloketarik burutu eta inork ez du erasoa bere egin.
Bahiketak eta beste mota batzuetako hilketa bortitzak biderkatu egin dira azken asteetan Aiba estatuan, baina bahitu gehienek ez dute kalterik jasaten eta askatu egiten dituzte erreskatea jasotzen dutenean. Ondoan dagoen Delta estatuan Ejerzitoak Nigerreko Deltaren Burujabetzaren aldeko Mugimenduko matxinatuen aurka hasitako erasoalditik ihesi dabiltzan milizianoei egotzi diete egoeraren errua Aiba estatuko agintariek.
