Aviso: Esta noticia tiene más de un año. Última actualización: 18/03/2010 12:36
Sopelako (Bizkaia) Kurtzio Kultur Etxeak Palestinari buruzko "Welcome" erakusketa hartuko du apirilaren 9ra arte. Erakusketaren bidez, Bakea eta Duintasuna elkarteak eta Biladi Palestinar Kultur Zentroak herri palestinarraren errealitatea hurbildu nahi diete herritarrei. Erakusketa 14 taulek osatzen dute; horietan autore ezberdinen argazkiak, mapak, testu laburrak eta Palestinako olerkarien bertsoak daude. Erakusketarekin batera, hitzaldi bat egingo da martxoaren 23an, arratsaldeko 18:00etan, Kurtzio Kultur Etxean bertan.
Sopelako Udaleko iturriek gaur jakinarazi dutenez, Bakea eta Duintasuna garapenerako lankidetzaren, elkartasunaren eta giza eskubideen esparruan lan egiten duen elkarte independentea da, nazioarteko harreman zuzen eta solidarioagoak eraikitzeko asmoz gizartearen sentsibilizazioan eragina izan nahi duena mundu mailan garapen berdintsuago bat lortzeko.
Bakea eta Duintasuna 1995. urtean sortu zen sentsibilizazio esparruan lanean hasi zelarik. Helburua gaur egun dagoen garapenaren ereduarekiko kontzientzia kritikoa sortzea zen, eredu hau bidegabe eta desberdintasunen eragiletzat hartzeagatik.
Bestalde, Biladi Palestinar Kultur Zentroa 2003an sortutako irabazi asmorik gabeko elkartea da, herri palestinarraren eta euskaldunaren arteko harreman kulturalak sustatzeko helburuarekin. "Biladi" izena "nire lurra" esan nahi duen izen arabiarra da, Lurralde Okupatuetan eta errefuxiatuen kanpanentuetan sakabanatuta bizi diren zortzi milioi palestinarren lurra, alegia.
Biladi elkarteak palestinarren errealitatea, bizitza, kultura, ohiturak eta tradizioak sustatu eta landu nahi ditu interesa duten erakunde eta pertsonengan.