BILBO, 8 Ene. (EUROPA PRESS) -
ACBko saskibaloi Kopako 74. edizioko zozketa egingo da datorren astelehenean Guggenheim Bilbao Museoan, Anne Igartiburu bizkaitarra aurkezle dela, eguerdiko 12:30etatik aurrera.
Txapelketa Barakaldoko BECen jokatuko da otsailaren 18tik 21era bitartean. Ekitaldia eguerdiko 12:30etan hasiko da eta sailkaturiko zortzi taldeetako ordezkariak eta hiriko eta ACBko agintariak izango dira bertan, Eduardo Portela ACBko presidentea buru dela.
Ligako lehenengo faseko azken bi jardunaldiak jokatzeke, sei talde Koparako sailkatuta daude jada: Regal FC Barcelona, Real Madrid, Caja Laboral, Power Electronics Valencia, DKV Joventut, Cajasol eta Bizkaia Bilbao Basket. Talde bizkaitarrak etxeko talde gisa parte hartuko du txapelketan.
Oraindik plaza bat gelditzen da Kopa jokatzeko, eta bost taldek dute sailkatzeko aukera: Lagun Aro GBC, Asefa Estudiantes, Suzuki Manresa, Unicaja eta Xacobeo Blu:Sens. ACB Ligako asteburu honetako jardunaldia bukatzean berdinketarik badago, berdinketa hausteko hurrengo faktorea taldeen arteko 'basket-average' delakoa izango da.
