BILBO, 30 (EUROPA PRESS)
Bilboko Arangoiti auzoak (Deustuko barrutia) XI. Euskal Jaia ospatuko du maiatzaren 5etik 10era bitartean, Bilboko Udaleko Kultura eta Hezkuntza Sailak, Bihotz Alai Folklore Taldeak, Haize Alde Kultur Taldeak, Bihotzaran Auzo Elkarteak, Arangoitiko Gazte Asanbladak eta Arangoitiko Batzokiak antolaturiko egitarauarekin. Protagonista nagusiak musika eta dantza izango dira, baina txikienentzako ipuin kontalariak, tailerrak eta antzerkia ere izango dira.
Antolakuntzak jakinarazi duenez, Euskal Jaia maiatzaren 5ean hasiko da, 18:00etan, haurrentzako zine-forum batekin. Hurrengo egunean, maiatzaren 6an, ipuin kontalariak izango dira: Maite Arrese kontalariak, Mau Ziemkewick biolinistak lagunduta, eta Olatz Landaren irudiekin, Dalai Lama maitasuna eta elkartasuna gizakiarentzat ezinbestekoak direla dioen horretan oinarritzen diren "Maitasun ipuinak" aurkeztuko ditu.
Maiatzaren 7an musika izango da nagusi, Euskotarrak taldearen kontzertuarekin, Araneko elizan, 18:30etan. Maiatzaren 8an dantza ikastaroak izango dira Institutuan, 18:00etan, eta batukada bat Arangoitiko Batuke Bulegoa taldearekin, 19:30etik aurrera.
Maiatzaren 9an, goizez, txikienentzako tailerrak izango dira Araneko plazan, eta Ondalan Erraldoien konpartsak ibilbidea egingo du auzotik. Folkloreak jarraipena izango du 13:00etan, Bihotz Alai taldearen euskal dantzen emanaldiarekin, Araneko plazan.
Bihotz Alai taldeak arratsaldean jarraituko du, 16:00etan, Institutuan hasiko den erromeriarekin, eta horren ondoren, 17:30ean, umeentzako berbena izango da. Ekitaldi hori Eidabe konpainiak gidatuko du, "Sardina freskue" aurkeztuz, itsasoko euskal abesti zaharren bitartez txikienen partaidetza bilatzen duen antzerki ikuskizuna. Jaiak, auzoan arituko diren Deustuko gaita jotzaile eta txistulari taldeekin jarraituko du, eta horien ostean, 20:30ean, Gibelurdinek taldeak joko du.
Arangoitiko Euskal Jaiaren 11. edizioa maiatzaren 10ean amaituko da, musika gehiagorekin. Goizeko 11:00etan Deustuko gaita jotzaileak eta txalapartariak arituko dira, eta amaitzeko, Mikel Galarzaren eta bere ikasleen bertsoak izango dira, 12:30ean, Araneko eta Egileor plazatan.
