DONOSTIA, 24 (EUROPA PRESS)
Eusko Ikaskuntzaren mendeurrena eta berriro sortu zeneko berrantolaketaren urteurrena dela eta, bazkideei dei egin die ekainaren 2an Oñatin egingo den "ospakizun eta omenaldi" Batzar Nagusira joan daitezen.
1918an Eusko Ikaskuntzaren lehen kongresua eta 1978an diktadura ondorengo lehen ekitaldia egin ziren Gipuzkoako herrian izango da festa giroan egingo den Batzar Nagusia. Ekainaren 2koa, batez ere, Eusko Ikaskuntzako bazkideentzako ospakizun eta topaketa eguna izatea lortu nahi da.
Eusko Ikaskuntzak jakinarazi duenez, Oñatiko Foruen Plazan, 10.30ean, Oñatz Dantza Taldeak ongietorria egingo die Eusko Ikaskuntzako bazkideei. Dantzariek lagunduta Santa Ana antzokira joango dira, bertan hasiko baita ekitaldia, 11.00etan. Iñaki Dorronsoro lehendakaria eta Xabier Alkorta mendeurreneko ekitaldien antolaketa batzordeko lehendakariak hitz batzuk egin ondoren, Oñatiko Udalak, alkatea ordezkari duela, Eusko Ikaskuntzaren Ohorezko Bazkide titulua jasoko du.
Jarraian, Eusko Ikaskuntzako kide beteranoenei omenaldia egingo zaie. 1978an Eusko Ikaskuntza berrantolatzeko lanean aritu zirenei eskerrak emateko omenaldi xume baina kutuna izango da.
Bukatzeko, etapa desberdinetan eta egoera historiko aldakorretan Eusko Ikaskuntza zuzentzeko ardura hartu zutenei egingo zaie omenaldia: Julian Elorza, Jose Miguel Barandiaran, Gregorio Monreal, Juan Jose Goiriena de Gandarias, Javier Retegui eta Joxe Mari Muñoa. Batzar Nagusia ohorezko aurreskuarekin amaituko da.
