BILBO, 19 (EUROPA PRESS)
Traineru Kluben Elkarteak (TKE) eta Bizkaiko Foru Aldundiak lankidetza hitzarmen bat sinatu dute, euskarak Eusko Label Ligan presidentzia handiagoa izan dezan. Arraunean ere euskararen erabilera sustatzea bilatzen du bi erakundeek sinaturiko akordioak.
Hitzarmenaren aurkezpenean parte hartu dute Borja Rodrigo TKEko presidenteak eta lehiaketaren lau traineru bizkaitarrek (Kaiku Producha, Zierbena Bahías de Bizkaia, Ondarroa Cikautxo eta Urdaibai Avia), Unai Rementeria Bizkaiko ahaldun nagusiak eta Lorea Bilbao Euskara eta Kulturako diputatuak.
Horrela, Bilboko Kale Nagusian Bizkaiko Foru Jauregiaren aurrean egindako ekitaldian, traineru bakoitzean Euskararen Txantxangorriaren irudia jarri dute, erakunde publiko eta pribatuek eta arlo guztietako eragile sozialek partekatzen duten euskararen ikur berria.
Bilbaok nabarmendu duenez, TKEk "bere egin du euskara erabiltzeko gonbidapena". "Guztiok batera arraun egin nahi dugu euskara gero eta gehiago eta gero eta alor gehiagotan erabiltzeko, eta hori gainerako kirolekin partekatzeaz gain, euskara erabiltzeko gonbidapen hau Bizkaiko gizarte guztira zabaldu nahi dugu".
Halaber, Rodrigoren hitzetan, TKEk "beti sustatu izan ditu euskara eta galiziera, eta hitzarmen honekin lortu nahi duguna gure konpromisoa are gehiago sendotzea da". Gainera, "Euskararen Txantxangorria bezalako proiektuek duten garrantzia" azpimarratu nahi izan du, "hizkuntzaren hedakuntza eta normalizazio prozesua aurrera eraman ahal izateko".
2016TIK
Bizkaiko traineru guztiek Euskararen Txantxangorria kanpainarekin bat egin zuten 2016an ere, eta euskara erabiltzeko gonbidapena luzatzen duen ikur berria zabaldu eta ezagutarazteaz gain, herritarrak sentsibilizatu eta erabilera aukera berriak sustatu zituzten.
Aurten, Bizkaiko Aldundiak eta Bizkaiko arraun taldeek lankidetza sendotu dute urrats bat gehiago emanaz, eta TKEk, Eusko Label Liga osoan zehar euskararen presentzia bermatu eta sendotzeko konpromisoa hartu du.
Hitzarmenari esker, kirolariek, klubek, Bizkaiko Federazioak eta Eusko Label Ligak konpromisoa hartu dute euskara, galiziera eta gaztelania erabiltzeko, lehiaketan parte hartuko duten traineruetako hizkuntza ofizialak diren heinean. Hala, "euskara sekula baino agerikoagoa" izango da, eta, besteak beste, Eusko Label Ligako espazio guztietan presente egongo dela bermatuko da eta komunikabide edo bisitariekin euskara erabili ahal duten pertsonak identifikatuta egongo dira.
