BILBO, 15 (EUROPA PRESS)
Expodistrito Bilboko barrutietako udal zentroetan egiten den aldi baterako erakusketen zikloak 2016ko lehen hiruhilekoko programa inauguratuko du datorren astelehenean, urtarrilaren 18an. Apirilaren 14ra arte Abando-Barrainkua, San Inazio-Ibarrekolanda, Otxarkoaga, Begoña, San Frantzisko, Castaños, Errekalde eta Burtsako udal zentroetara doazenek "oso adierazpen estilo eta teknika anitzeko" bost pintura erakusketez gozatu ahal izango dute. Zehazki, José Ignacio Sarasua, Ana Basarte, José Ramón Muro, Mari Kruz Bravo Gasamanes eta Nieves Moro Abascal artistek erakutsiko dituzte euren lanak.
Bilboko Udalak jakinarazi duenez, antolatutako lehenengo erakusketek datorren astelehenean zabalduko dituzte ateak. Castañoseko udal zentroan, akriliko eta olio teknika mistoan egindako José Ramón Muro artistaren bilduma eklektikoa izango da. "Las luces y las sombras" izenburupean, artistak erakusten duen bilduman koadro bakoitza "kontu handiz planifikatutako proiektua da, une jakin bateko argazki errealitatea irudikatuz, teknika landua eta kontu handiz egindako konposizioa erabiliz".
Abando-Barrainkuako udal zentroan, José Ignacio Sarasua artista gipuzkoarraren erakusketa bat izango da. Ibilbide luzean ia pinturako teknika guztiak erabili dituen artistak olio bilduma bat aurkeztuko du oraingoan, ikusmen eragin handiena bilatzeko txantiloiak erabiliz, adibidez.
Begoñako udal zentroko erakusketa aretoak, Ana Basarte artistak berak "euren testuingurutik ateratako kaleko une txiki eta bestelako huskeria" gisa definitu dituen akuarelen erakusketa eskainiko du. Urtarrileko bigarren hamabostaldirako erakusketen egutegia Nieves Moro Abascalen margolanekin osatuko da; oraingoan, "akuarelaren eta bizitzaren arteko antzekotasunei buruzko gogoeta egiten duen zenbait lan" proposatuko ditu.
MARI KRUZ BRAVO
Expodistrito programa osatzen duen bosgarren erakusketa otsailan irekiko da, eta Mari Kruz Bravo Gasamanes artista esperimental gaztearena izango da. Bere lan abstraktuaren bitartez heriotzari dion beldurra erakusten du munduaren aurrean, eta gizakiaren basakeria eta Ama Lurrari ematen zaion tratu txarra salatzen ditu. Pozak eta algarak ere leku garrantzitsua betetzen dute bere lanean.
Artistak hainbat ehundurekin egiten du lan, eta zenbait materialekin esperimentatzen du. Material horien artean daude eskaiola, zementua, oihalak, ugertutako burdina, azuleju zaharrak, kare harria, adreilu hautsa eta bidean aurkitzen dituen objektuak. "Déjate llevar" izeneko erakusketa otsailaren 2tik 12ra ikusi ahal izango da Otxarkoagako udal zentroan.
Expodistrito programa Bilboko Udaleko Kultura Sailaren ekimena da, eta helburuen artean hiribilduko arte adierazpenak deszentralizatzea eta ikusleei artista gazteen lanak aurkeztea daude, bai eta jada ezagunak diren beste batzuen erakustoki izatea ere. Ohikoa denez, erakusketak txandakatuz joango dira. Erakusketa bakoitzaren egun zehatzak udaltegietan, barrutietako programazio jasotzen duen www.kulturabarrutik.eus edo www.bilbaokultura.eus webguneetan eta 010 telefono zenbakian kontsulta daitezke.
