Foto: AENA
GASTEIZ, 10 (EUROPA PRESS)
Forondak ordezko aireportu gisa funtzionaltasuna berreskuratzea eskatu dio Eusko Jaurlaritzako Ingurumen eta Lurralde Politikako sailburu Ana Oregik Espainiako Gobernuko Sustapen ministro Ana Pastorri, eguraldi txarra dagoenean inguruko aireportuetatik desbideratutako hegaldiak hartu ahal izan ditzan, H24 izaera berreskuratzearekin batera, Loiun lurra hartzerik ez duten hegazkinak Bartzelona edo Miarritzera desbideratu behar ez izateko.
Ana Pastorri igorritako gutun batean, Ana Oregi "biziki kezkatuta" agertu da Gasteizko aireportuaren operatibotasunagatik. Ingurumen eta Lurralde Politikako sailburuaren iritziz, "Eusko Jaurlaritzak, bai AENAren bitartez bai Abiazio Zibileko Zuzendaritza Orokorraren bitartez, kezka agertu du Forondako ordutegia gaueko ordutegira murrizteak zerbitzua baldintza egokietan emateko ekarritako mugen inguruan, are gehiago AENAren sareko laugarrena denean zama bolumenari dagokionez".
"Horri -azaldu dio Oregik Pastorri- beti gauzatu dituen beste eginkizun batzuk gehitu behar zaizkio, ordezko aireportuko eginkizuna, besteak beste".
Halaber, gogorarazi du azken asteetan izandako eguraldiaren ondorioz, Foronda eguneko ordutegian operatibo ez zegoenez, Loiu/Bilboko aireportutik desbideratutako hegaldiek beste aireportu batzuk erabili behar izan dituztela, hala nola Noain/Iruñea edo Miarritze, "Foronda zirkulaziorako itxita zegoelako". Bere ustez, "Forondak eginkizun hori arazorik gabe beteko zukeen, H24 ordutegia galdu aurretik ohikoa zen moduan".
