GASTEIZ, 3 (EUROPA PRESS)
Ramiro Gonzalez Arabako diputatu nagusia Europako Parlamentuan instalazio nuklearrak desegiteari buruzko jardunaldi batean parte hartuko du hizlari bezala datorren astelehenean, otsailaren 6an, eta Garoñako zentral nuklearra berriro irekitzearen aurkako jarrera azalduko du. Gardentasun Nuklearraren Behatokiak gonbidatuta doa Arabako ahaldun nagusia Bruselara.
"Asmo dut Garoñako zentral nuklearraren egungo egoera azaltzeko, hura
berriz irekitzeko Espainiako Gobernuak zer gardentasun faltarekin diharduen jakinarazteko eta argi uzteko Araba irekiera horren aurka dagoela, erabat aurka. Oso garrantzitsua da Europak bertatik bertara izatea horren berri", adierazi du diputatu nagusiak.
Gonzalezek parte hartuko duen jardunaldiaren helburuak dira parte hartzaileei, zientziaren ikuspuntutik, desegite prozesuen eta prozesu horiek eragiten dituzten erronken berri ematea, Europako Batasuneko estatu kideetan horretarako baliatzen diren jardunbideak aztertzea eta Europan den egoeraren ikuspegi orokorra eskaintzea. Desegite politiketan administrazio publikoek zer aukera duten ere aztertuko da.
Hitzaldiak izango dira jardunaldiaren lehen zatia, eta Europan diren zentral nuklearren desegite prozesuen ikuspegi orokorra emango dute. Horiek horrela, Paolo Peerani Europako Batzordeko Nuklearrak Desegiteko Unitatearen burua egungo egoerari buruz mintzatuko da. Suediako eta Italiako adituek ere parte hartuko dute eta bakoitzak bere herrialdean izandako esperientziaren berri emango du. Gonzalezek emango duen "Desegitea eta gardentasuna. Blokeoa Espainiako zentral nuklear zaharrenean: Santa Maria de Garoña" hitzaldiarekin amaituko da mintegia.
Jardunaldian parte hartzearekin batera, Arabako ahaldun nagusia Europako Batzordeko Ingurumen zuzendari Daniel Callejarekin eta Europako Parlamentuko euskal diputatuekin bilduko da.
