BILBO, 18 (EUROPA PRESS)
Bilboko Udaltzaingoak gidarien artean alkohola eta drogak kontrolatzeko Gabonetako kanpaina abiaraziko du larunbat honetan, abenduaren 19an, eta 2016ko urtarrilaren 3ra arte egongo da martxan, Bilboko Udalak jakinarazi duenez.
Egun hauetan hirian zirkulazio handiagoa izaten da eta leku batzuetan, batez ere sarrera-irteeretan eta merkataritza aldeetan, auto pilaketak izaten dira. Horrela, larunbaetik urtarrilaren 3ra, kontrola eta zaintza areagotuko da, batez ere zirkulazio gehieneko lekuetan, errepidean istripuak izateko faktoreetako bati ahal den neurrian aurre hartzeko; izan ere, hildakoak izaten diren istripuen %30ean agertu ohi den kasua da.
Euskal Herriko Bide Segurtasuneko Plan Estrategikoaren barruan dago ekimen hau, eta lortutako datuak dagoeneko aurreko edizioetakoak jasota dituzten taula batzuetan jasoko dira, bilakaera zein den ikusteko. Datu horien arabera, 2014ko abenduaren 20tik 2015eko urtarrilaren 4ra bitarteko kanpainan Bilboko Udaltzaingoak errepideetan 221 proba egin zituen (209 alkoholemia neurtzeko eta 12 drogen kontsumoa kontrolatzeko), zortzik positibo eman zuten eta isunak jarri zitzaizkien.
Bilboko Udalak ohartarazi du alkohola eta beste substantzia batzuk ez direla bateragarriak gidatzearekin, eta Gabonetako jaiak direla eta, garraio publikoa erabiltzeko aholkua eman die herritarrei.
