av2" class="NormalTextoNoticia" itemprop="articleBody">
DONOSTIA, 16 (EUROPA PRESS)
Gipuzkoako Foru Aldundiak 816.647 euro bideratuko ditu 2015ean irabazi asmorik gabeko elkarteen gizarte jarduerak sustatzeko. Gizarte Politikako Sailak eskaintzen dituen diru laguntza hauek eskatzeko deialdia astelehen honetan argitaratu da Gipuzkoako Aldizkari Ofizialean eta, asteartetik aurrera, proiektuak aurkezteko epea hilabetekoa izango da, foru erakundeak jakinarazi duenez.
Gizarte politikari "berebiziko garrantzia" ematen dio Gipuzkoako foru Gobernuak, "are gehiago krisi garaian". Horrela, beste egitasmo batzuen artean, hirugarren sektorea bultzatzea du xede Gizarte Politikako Sailak eta, horregatik, gizarte zerbitzuen eremuan diharduten irabazi asmorik gabeko gizarte ekimeneko elkarteei zuzendutako diru laguntzak ateratzen ditu urtero.
Gizarte Ekimena Sustatzeko Planaren diru kopurua ondorengo lerroetan kokatzen diren jarduerak finantzatzera dago bideratuta: gizarte esku hartzeko programak egiteko diru laguntzak; prebentzioko eta sentsibilizazioko programak egiteko diru laguntzak; eta gizarte behar berrien eta gizarte arretaren inguruko ikerketa eta berrikuntza proiektuak egiteko diru laguntzak.
Laguntza lerro hauen bitartez, joan den urtean, 62 elkartek eta entitatek aurkeztutako 234 proiektu finantzatu zituen Gipuzkoako Aldundiko Gizarte Politikako Sailak.
