BILBO, 15 (EUROPA PRESS)
Ertzaintzaren agenteek 34 urteko gizonezko bat atxilotu zuten joan den asteartean, Bizkaiko Abanto udalerrian, 2014ko urrian Portugaleten (Bizkaia) egindako sexu eraso bat leporatuta, Eusko Jaurlaritzako Segurtasun Sailak jakinarazi duenez.
Salaketan jartzen duenez, 2014ko urriaren 12an, goizaldean, neska gazte bat etxera zihoan Portugaleten, eta atalondora sartzera zihoala, gizonezko bat atzetik hurbildu zitzaion eta indarrez lurrera bota eta ukabilkadak ematen hasi zen, kamiseta kentzen saiatzen zen bitartean, sexualki eraso egiteko asmo argiarekin.
Neska gazteak aurre egiten zionez, gizonezkoak sexu ukituak baino ez zizkion egin ukabilekin kolpatzen zuen bitartean, eta bi eskuekin burutik heldu eta lorontzi baten kontra kolpatu zion burua bortizki. Biktima ezin zuenez menderatu, gizonezkoak kolpeak emateari utzi eta lasterka alde egin zuen bertatik.
Ertzaintzak gertatutakoaren berri izan zuenean abian jarritako ikerketan zailtasun ugari izan dira. Hala ere, ikerketaren arduradunek azkenean lortu dituzte ustezko erasotzailea erruztatzeko beharrezko frogak. Horrela, 34 urteko susmagarria joan den asteartean atxilotu zuten, Abanton, sexu erasoa egotzita, eta polizia egoitzara eraman zuten.
