DONOSTIA, 18 Ene. (EUROPA PRESS) -
Ertzaintzaren agenteek gizonezko bat atxilotu zuten asteartean Donostian, ebasketa delitu bat egotzita. Atxilotuak 610 euro balio duten bi bideo kontsola lapurtu omen zituen Donostiako saltoki batean, eta segurtasun zerbitzuko kideek Ertzaintza iritsi arte atxiki zuten. Jarritako salaketan islatu denez, susmagarriak hainbat hilabetez lapurtzen aritu da saltoki horretan, eta guztira 8.000 eurotik gorako balioa duten produktuak lapurtu ditu.
Eusko Jaurlaritzako Segurtasun Sailak jakinarazi duenez, astearte arratsaldeko 14:00ak aldera, Urbieta kaleko saltoki bateko segurtasun zerbitzuko kideek ikusi zuten pertsona batek bi bideo kontsoletako alarmak moztu zituela. Bideo kontsola horietako bat PS4 bat zen eta bestea Xbox bat, guztira 610 euroko balioa dutenak.
Susmagarria ez zen kutxetatik pasa bideo kontsolak ordaintzeko eta, establezimendutik irteteko gunera hurbildu zenean, segurtasun zerbitzuko kideek geldiarazi zuten. Ertzaintzaren agenteak bertaratu ziren arte atxiki zuten bertan, eta ertzainek atxilotu egin zuten. Lokalean aliketa batzuk aurkitu zituzten, itxuraz atxilotuak alarmak bortxatzeko erabili zituenak.
Saltokiko arduradunak jarritako salaketan aditzera eman da aurreko hilabeteetan gizonezko horrek, batzuetan konplize baten laguntzarekin, ebasketak egin zituela bere dependentzietan, eta lapurtutako produktu guztien balioaren batura 8.000 eurotik gorakoa dela. Atxilotuak 42 urte ditu eta asteazken honetan eramango dute epailearen aurrera.
