BILBO, 3 (EUROPA PRESS)
Udaltzaingoak gizonezko bat atxilotu zuen igandean Getxon, bikotekidea kalean jotzea egotzita. Erasoa arratsaldeko 18:45ean izan zen, Areetan, eta lanean ez zegoen udaltzain batek ikusi eta geldiaraztea lortu zuen. Egileak ihes egin zuen, baina ondoren udaltzaingoak atxilotu egin zuen.
Getxoko Udalaren arabera, biktimak erasoaren seinale argiak zituen, baina ez zuen gertaera salatu nahi izan, eta, horregatik, agenteak ofizioz aritu ziren eta genero indarkeriako ustezko delituaren eginbideak egin zituzten.
Keltse Eiguren Getxoko Udaleko Berdintasun Zerbitzuko zinegotziak erasoa gaitzetsi du, eta tratu txar fisiko edo psikikoak jasaten dituzten emakumeek Gizarte Zerbitzuetara jo dezaketela gogoratu du, 944 660 151 telefonoan, egoeratik ateratzeko laguntza emango baitiete. Halaber, Getxoko Udaltzaingora (944 660 202) edo Ertzaintzara (944 063 420) joan daitezkeela eta Eusko Jaurlaritzaren tratu txarren biktimen telefonoa (900 840 111) eta SOS Deiak (112) erabili ditzaketela gogoratu du.
