BILBO, 23 Oct. (EUROPA PRESS) -
Gogora institutuaren zuzendaritza kontseiluak 2017-2020 aldirako Jarduera Programa onartu du, behin ekarpenetarako epea agortuta. Programa uztaileko zuzendaritza kontseiluan aurkeztu zen eta bederatzi ekimen jasotzen ditu, hiru eremutan egituratuta: zeharkakoa, memoria historikoari dagokiona eta gertuko memoriari dagokiona.
Zuzendaritza kontseiluaren bilera Gogorak Bilbon duen egoitzan izan da, Jonan Fernandez Eusko Jaurlaritzako Giza Eskubide, Bizikidetza eta Lankidetzaren idazkari nagusia eta Aintzane Ezenarro Gogoraren zuzendaria biri zirela.
Monika Hernando Jaurlaritzako Biktimen eta Giza Eskubideen zuzendaria, Izaskun Landaida Emakundeko zuzendaria, Eusko Legebiltzarrean ordekaritza duten alderdiak, Arabako, Gipuzkoako eta Bizkaiko aldundiak (Unai Rementeria Bizkaiko ahaldun nagusia tartean), Eudel eta gaian adituak diren eta Eusko Legebiltzarrak izendaturiko hiru pertsona egon dira bileran.
Institutuaren arduradunen arabera, hezkuntza jarduera planaren "eremu estrategikoa" da, eta, horregatik, ekimenetako bat memoriaren balio pedagogikoak, dimentsio historikoa eta dimensio etikoa hezkuntza eremuan sartzera bideratuta dago.
Gertuko memoriari lotutako proiektuei dagokionez, Gogorak ikus-entzunezko testigantzen funtsa zabaltzen jarraituko du biktimen eta herritarren lekukotasunak jasoz. Memoria historikoaren eremuan egia berreskuratzen laguntzeko proiektuak nabarmentzen dira: 1936-1978 aldian izandako giza eskubideen urraketei buruzko txostena, gorpuak hobietatik ateratzeko plana, DNA bankua eta memoria arloko erakundeekin lankidetza.
Astelehen honetan bildu den zuzendaritza kontseiluan 2018. urterako 2.056.000 euroko aurrekontu proiektua onartu da. Aurrekontua bat dator erakundearen sendotzea bilatzen duen jarduera programarekin.
