BILBO, 16 (EUROPA PRESS)
Juan Mari Aburto Bilboko alkateak 2015eko Bilboko Ospetsuak izateko nor aukeratu duten jakinarazi du asteazken honetan, eta horien artean daude Gorabide elkartea, Txetxu Rojo, Emilio Sagi, Martina de Zuricalday Bilbao Gozodendak, Alfonso Santiago eta Karmele Goñi. Izendapen horrekin, Bilboren izen ona zabaltzen lagundu duten pertsonen edo erakundeen ibilbidea aitortu nahi du udalak.
2001ean Iñaki Azkuna orduko alkateak ezarri zuen lehenengo aldiz aitorpen hau, eta egungo alkatearen talde berriak berriro hartu du "Bilboren historia, ibilbide eredugarri eta nabarmenak izan dituzten pertsonekin aberastea eta, aldi berean, udal honek eman dezakeen izendapenik handienaren bidez saritzea eta aitortzea".
Horrela, sei titulu berri gehitu zaizkio Bilboko Ospetsuak zerrendari: Martina de Zuricalday Bilbao Gozodendak, 1830etik datorren usadioarengatik eta gozokiak ondo egiten jakiteagatik; Txetxu Rojo futbolari ohia, Athleticek ordezkatzen dituen balioen eta sentimenduaren ikurra izateagatik; Alfonso Santiago Last Tour kontzertu sustatzailearen jabea, Bilbo musikaren nazioarteko erreferente bihurtzeko egindako lanarengatik; Emilio Sagi Arriaga antzokiko zuzendari artistikoa, erakutsitako konpromiso, jeinu eta sormenarengatik; Gorabide elkartea, adimen ezintasuna dutenen aldeko jardueran 50 urte aritzeagatik; eta Karmele Goñi historiagile eta etnografoa, etengabeko lana egiteagatik Bilbon euskararen eta euskal kulturaren alde Bilbon.
Bilboko Ospetsuak zerrenda 84 izendapen ditu gaur egun, azken edizioko seiak gehituta. Izendatutakoen artean daude musikariak, abeslariak eta konpositoreak, historiagileak, idazleak, sukaldariak, aktoreak, enpresak eta enpresetako zuzendariak, ikastetxeak, zinemako zuzendariak eta modaren profesionalak, artistak edota jatetxeak, besteak beste.
