BILBO, 25 (EUROPA PRESS)
Gripeak "goia jo du" Euskal Autonomia Erkidegoan (EAE) eta 2017ko hirugarren astean intzidentzia tasa 100.000 biztanleko 417,17 kasutan kokatu da, aurreko astean 390,5 kasukoa izan zen bitartean. Hain zuzen ere, urtarrilean sasoiko intzidentzia tasarik altuenak eman ohi dira.
EAEko Jagoletza Sareak emandako datuen arabera -astero eguneratzen dira-, egindako mikrobiologia analisiek baieztatu dute gripe isolamenduen herena AH3 birusarena dela. Orain arte, sasoian zehar detektatu diren birus guztiak A motakoak dira eta aurtengo txertoan sartu diren birusekin bat datoz.
Baieztatutako gripearen ondorioz ospitaleratuak izan diren pertsonei dagokienez, 170 pertsona ospitaleratu dituzte egoera larrian gripeagatik sasoia hasi zenetik (%40 txertoa hartu gabekoa), eta batez besteko adina 72 urte da. Ospitaleratuak izan diren pertsonen %93, 64 urtetik gorakoen taldekoa edo gripearen ondoriozko konplikazio larriak izateko arriskua dutenen taldekoa zen.
Zainketa Intentsiboen Unitateek (ZIU) 40 gaixo hartu dituzte eta gehienek (hamarretik zortzik) arrisku faktoreak agertzen zituzten. Gainera, 18 hildako egon dira sasoia hasi zenetik, guztiak arrisku faktoreak dutenen taldekoak edo 64 urtetik gorako taldekoak, eta erdiak txertoa jarri gabe zutenak. Hildakoen batez besteko adina 78 urte da.
Horrenbestez, txertaldian zehar txertoa jartzeak duen garrantzia azpimarratu dute beste behin Eusko Jaurlaritzako Osasun Sailak eta Osakidetzak, gripearen aurkako eta konplikazio larriak saihesteko metodorik eraginkorrena baita, eta arrisku handiko taldeen kasuan gehienbat: haurdun dauden emakumeak, 64 urtetik gorakoak eta gaixo kronikoak.
Bestalde, Lehen Mailako Arretako zentroetan gripeari loturiko kontsultek behera egin dute aurreko astearekin alderatuta. Guztira, 6.421 kontsulta egon dira, pasa den astean 8.988 izan ziren bitartean, eta lehen astean, ostera, 4.803. Kontsulta tasa berdintsuak egon dira lurralde guztietan.
