BILBO, 30 (EUROPA PRESS)
Guggenheim Bilbao Museoa irekita egingo da udako astelehenetan, uztailaren 4tik irailaren 12ra arte, 10.00etatik 20.00etara. Ohikoa denez, udan hirira hurbiltzen diren turisten eskaria asetzeko zabaldu da ordutegia, eta hala egingo du Bistró Guggenheim Bilbao jatetxeak ere, museoko arduradunek iragarri dutenez.
Tarte horretan museora hurbiltzen diren guztiek arte programazio honetaz gozatzeko aukera izango dute: "Louise Bourgeois. Izatearen egiturak: Gelak", "Andy Warhol: Itzalak", "Hiriko ikuspegiak: Parisko Eskola, 1900-1945", "Guggenheim Bilbao Museoko Bildumaren maisulanak" eta Eija-Liisa Ahtilaren "Deikundea" bideoinstalazioa. Azkenik, "Artea ikasbide" erakusketa ikusteko aukera ere izango da; urtero EAEko ikasle gazteek egindako artelanak erakusgai izaten dira bertan.
Bistró Guggenheim Bilbao jatetxeak eta Bar Guggenheim Bilbao tabernak ere udako ordutegia izango dute eta astelehenetan irekita izango dira: Bistró Guggenheim Bilbao jatetxea zabalik egongo da 13.00etatik 15.30era bazkalorduan eta 20.00etatik 22.30era afalorduan, "bertakoei zein turistei ikuspegi berritzaile batetik eguneratutako Bilboko platerak eskaintzeko, nortasun handiko gune informal batean eta neurrizko prezioan".
Uda honetan, gainera, jatetxeak eskaintza osatu du eta udako gauetarako beste plan bat proposatzen du: jan aurreko koktelen karta eskainiko du lehenbiziko aldiz afalorduan, gauez doazenenentzat. Terraza gaueko 01.00etara arte egongo da zabalik. Horrez gain, Bar Guggenheim Bilbao taberna 09.30etik 20.30era izango da irekita; "bertan biltzen dira inguruko gastronomiaren eta abangoardiako sukaldaritzaren onena".
