NEW YORK, 23 May. (EUROPA PRESS) -
Gutxienez 89 pertsona hil dira igandean Joplin hiritik (Missouri, AEBtako erdi-mendebaldea) igaro den tornado suntsitzailearen ondorioz, Mark Rorh alkateak emandako azken balantzearen arabera.
Joplineko Hondamendien Kudeaketarako zuzendari Keith Stammer-ek adierazi du tornadoak hiriaren %10 eta %20 bitartean suntsitu duela. CNNri eskainitako adierazpenetan esan du zonalde suntsituena "hiriaren erdialdea" dela, biztanle askoko gunea, hain zuzen ere.
Stammer-ek azaldu du agintariek jendea harrapatuta egon daitekeen lekuen zerrenda bat egin dutela. "Gau osoan zehar egon gara lanean eta hala jarraituko dugu mundu guztia atera arte", ziurtatu du, laguntza deiari Kansas, Arkansas, Oklahoma eta Missouriko 40 agentzia baino gehiagok erantzun diotela gaineratuz.
Bestalde, Jay Nixon Missouriko gobernadoreak estatuko Guardia Nazionala aktibatu du, larrialdi egoera ezarri du eta tornadoa igaro ondoren bizirik egon daitezkeen lagunak aurkitzearen garrantzia azpimarratu du.
Saint John eskualde mailako zentro medikoak zuzenean jaso du tornadoaren indarra eta kalte handiak izan ditu bere egituran, agintariek CNNri adierazi diotenez. Eraikinaren kristalezko fatxada guztiz eraman du tornadoak eta zentroa hustu behar izan dute. Dirudienez, ia 115 kilometrora dagoen Dade konderriko auzokideek ospitaletik heldutako X izpien makina bat aurkitu dute.
