GASTEIZ, 23 (EUROPA PRESS)
EH Bilduk hedabideak, Internet eta hezkuntza sistema osoa kontuan izango dituen Euskararen Lege berri bat eskatu du, asteartean Euskararen Erabilera Normalizatzeko Legeak 33 urte beteko dituela gogorarazita. Koalizioaren iritziz, "bistan da 1982an lege horrek lortutako adostasun maila murriztu dela eta 33 urte hauetan izan duen garapena ere murritza izan dela".
Estitxu Breñas eta Xabier Isasi legebiltzarkideek azaldu dutenez, gauza asko aldatu dira Euskal Herrian 1982tik, eta indarrean dagoen Euskararen Legeak "ez ditu jasotzen", besteak beste, EITB, euskarazko hedabideak, Internet eta Euskal Eskola Publikoaren Legea.
Horrela, EH Bilduko legebiltzarkideek Euskararen Lege berri baten beharra aldarrikatu dute, "gaurkotua, garai digitalera egokitua eta behar den besteko adostasunaz eta babesaz, ez bakarrik talde politikoena, gizarte eragileak ere kontuan hartuta baizik". Izan ere, Euskara Normalizatzeko Legea "garai digitala baino lehenagokoa" dela esan dute, "historiaurrekoa ia-ia, eta ez du hizkuntzaren erabilera arautzen aro digitalean".
"Egungo legeak dituen hutsune nagusiak identifikaturik, lege berriak horiei erantzun beharko die eta, hortaz, hedabideak, Internet eta hezkuntza sistema osoa aintzat hartu beharko ditu ezinbestean, hizkuntzaren normalizaziorako giltzarriak direlako", azaldu dute.
Legealdia amaitzeko urtebete eskas falta dela, ez dago lege berria onartzeko denborarik, baina, hala ere, EH Bilduko legebiltzarkideen ustez, "datozen urteotan legean garatu beharreko giltzarriak adosteko aukera dugu alderdiok, eta guk hala eskatuko diegu gainerako taldeei, betiere euskararen erabilerari egiazko bultzada emateko".
