cia" class="NormalTextoNoticia" itemprop="articleBody">
BILBO, 14 (EUROPA PRESS)
Guztira 14.695 etxe eta lokal jabek eman zuten izena 2013. urtean Eusko Jaurlaritzako Enpleguko eta Gizarte Politiketako Sailak higiezinak zaharberritzeko dituen bi laguntza lerroetan.
Jaurlaritzaren 2013-2016 aldirako Renove Planaren helburu nagusiak, etxebizitza eta eraikinetako energiaren eraginkortasuna areagotzea, irisgarritasun baldintzak hobetzea, gizarte kohesioa indartzea eta enplegua sortzeko pizgarriak ematea dira. Renove Planari esker EAEko 52.000 etxebizitza birgaitu ahalko dira aldi horretan.
Lehen laguntza lerroak 1980a baino lehenagoko norbanakoen eta bizilagunen erkidegoen etxebizitzetan birgaitze lanak egiten laguntzea du helburu, bizigarritasuna hobetzeko, ezintasunak dituzten pertsonentzako sarbideak egokitzeko eta energiaren kontsumoa murrizteko. Lerro honetako gehieneko laguntza 15.000 eurokoa da, etxebizitza bakoitzeko.
Gehienbat babesten dira eskailera, balkoiak, hegalkinak eta erlaitzak sendotzea, etxaurreak konpontzea, igogailuak ipintzea eta etxebarruak berritzea. Halaber, eraikinaren bilgarri termikoa ukitzea dakarren etxebizitza berritze lanak egiten dira.
Eraikinak zein etxebizitzak zaharberritzeko laguntzen programa honetara bildutako 13.409 etxebizitzetatik, 7.989 Bizkaikoak izan ziren, 3.676 Gipuzkoakoak eta 1.744 Arabakoak. Badira beren lokala bizileku bihurtzeko lanak egin dituzten beste 596 jabe ere. Laguntzak, oro har, 14,5 milioi eurokoak izan dira.
2013-2016 aldirako Renove Planaren beste programa batek -ondare eraikian esku hartzeko proiektuak prestatzeko laguntza- sei milioi euro banatu zituen 690 proiekturen artean, batez ere eraikinen energiaren eraginkortasuna hobetzeko helburuz egindakoak.
