cia" class="NormalTextoNoticia" itemprop="articleBody">
DONOSTIA, 11 (EUROPA PRESS)
Espainiako Hauteskunde Batzordeak Gipuzkoako Foru Aldundiari jakinarazi dio Igeldo herriari bederatzi udal ordezkari dagozkiola, eta horrela, Igeldoko Batzorde Kudeatzailean Bilduk zazpi ordezkari izango ditu eta EAJk eta PPk bana. Hiru alderdiek izendatzen dituzten ordezkariek presidentea aukeratuko dute otsailaren 21ean, eta presidente horrek alkatearen funtzioak beteko ditu 2015eko udal hauteskundeak egin arte, Gipuzkoako Foru Aldunditik azaldu dutenez.
Igeldo Gipuzkoako 89. udalerria izendatu ostean, hauteskundeak izan arte Batzorde Kudeatzailea osatu beharko duela ezartzen du Foru Aldundiko 46/2013ko Dekretuak. Gipuzkoako Aldundiak Espainiako Hauteskunde Batzorde Zentralari eskatu zion Igeldoko Batzorde Kudeatzaile hori osatzeko zenbat zinegotzi dagozkion guztira eta horien alderdien artean nola banatuko ziren erabakitzeko, eta astelehenean eman zion bere erabakiaren berri.
Horrela, Espainiako Hauteskunde Batzorde Zentralak erabaki du Igeldoko Udal Batzorde Kudeatzaileari bederatzi zinegotzi dagozkiola: Bilduri zazpi eta EAJri eta PPri bana. Gipuzkoako Foru Aldundiak Donostiako Udaleko hiru alderdi politiko horiei eman zien astelehenean Espainiako Hauteskunde Batzorde Zentralaren akordioaren berri.
Beraz, hurrengo urratsa izango da Igeldoko Udal Batzorde Kudeatzailea osatzea. Horretarako, Bilduk, EAJk eta PPk batzorde horretan dagozkien ordezkariak izendatu beharko dituzte otsailaren 17a baino lehenago. Igeldoko Batzorde Kudeatzaileko kideek otsailaren 18ko Foru Diputatuen Kontseiluan hartuko dituzte beren karguak. Igeldoko bederatzi ordezkari horiek presidentea aukeratu beharko dute otsailaren 21ean; pertsona horrek alkatearen funtzioak beteko ditu eta besteek zinegotzien funtzioak, hurrengo udal hauteskundeak izan arte (2015eko maiatza).
