BILBO, 3 (EUROPA PRESS)
Iñigo Garatu artista gaztea Bilbao Artek ekoitzitako 2015eko laugarren erakusketaren protagonista da "Work spaces" ("Laneko guneak") bildumarekin, ostiral honetatik, uztailaren 3tik. Argazkiak egiteko eta eskulturak sortzeko proiektua industria astuneko fabriketan oinarritua dago eta Bizkaiko lan alorreko gaur egungo testuinguruan kokatzen da, Bilbao Artek jakinarazi duenez.
Erakusketa bitxi hau arratsaldeko 19:30ean inauguratuko da, Bilbao Artek Bilboko Urazurrutia kaleko 32 zenbakian duen aretoan, eta publikoarentzat irekita egongo da uztailaren 24ra arte, 17:30etik 20:30era bitartean, astelehenetik ostiralera.
Kultur zentroak azpimarratu duenez, "argazki erakusketan Bizkaiko industria izaerako lekuen ikuspegi desberdina azaldu nahi da, eta horien artean funtzionatzen ari diren eta bertan behera utzita dauden industria-eraikinen kanpoaldeak agertzen dira". Proiektua osatzeko forma geometriko xumeko hainbat eskultura sortu ditu egileak eta horiekin laneko barne-gune bat osatu da.
Iñigo Garatuk ekoizpen artistikoko beka bat irabazi zuen Bilbao Arte Fundazioan 2014an. Aurten, 39 artista egiten ari dira egoitza artistikoa Bilbao Arten, BBK Fundazioaren laguntzaz sortzaile gazteei eskaintzen dizkien bekei esker.
Artista 1990ean jaio zen eta Iurretan (Bizkai) bizi da. Durangaldean naturak gainezka inguratutako fabrikak dituzten industria-paisaietan oinarritu da erakusketa osatzeko. Argazkietan ageri diren fabrika horietako gehienak funtzionamenduan daude, langileak murrizteko prozesuetan murgilduta egon arren, eta gainerakoak geldirik daude.
"Gune horietako argazkiekin memoriaren zati bat osatu nahi dut eta gure historiaren dokumentu bat izatea nahi nuke, horietako asko ixten, eraldatzen edo eraisten ari direlako", azaldu du argazki digitalekin ekoitzi ondoren lan handia egin duen artistak.
Argazkiez gain, "Work spaces" erakusketan eskulturak ere sartu dira. "Zur eta marmol mota desberdinetan egindako laneko gune txikiak sortu nahi izan ditut poetikoki", azpimarratu du Garatuk.
