BILBO, 20 8EUROPA PRESS)
Araba, Bizkai eta Gipuzkoako Teknologia Parkeetako Administrazio Kontseiluek Jose Miguel Corres Abasolo izendatuko dute Euskadiko Parke Teknologikoetako presidente, Eusko Jaurlaritzako Ekonomiaren Garapen eta Lehiakortasun Sailak proposatuta. Gaur arratsaldean Araban, ostegunean Bizkaian eta ostiralean Gipuzkoan bilduko dira Teknologia Parkeetako Administrazio Kontseiluak, presidente berria eta batzordekide berriak izendatzeko.
Horrela, presidente izendapenera iritsi baino lehen, Administrazio Kontseiluko batzordekideen aldaketa egingo da, aurreko Jaurlaritzaren ordezkariak kendu eta kide berriak izendatuz, hau da, Juan Ignacio Garcia de Motiloa eta Estibaliz Hernaez sailburuordeak eta Imanol Aburto eta Leire Bilbao zuzendariak, Jose Miguel Corresekin batera.
Euskadiko Parke Teknologikoen Sareko presidente berria, Jose Miguel Corres Abasolo, enpresa zientzietan lizentziatua da, eta Bilbao Exhibition Centre-n (BEC) kontseilari ordezkaria izan da azken 12 urteetan. Aurretik ESI zentro teknologikoaren zuzendari nagusi izan zen, bai eta Administrazio eta Plangintza sailburuordea ere Eusko Jaurlaritzako Industria Sailean 1990eko hamarkadan.
Euskadiko Parke Teknologikoetan izango dituen erronka nagusiak dira Teknologia eta Berrikuntzarako Euskal Sistemaren berrantolaketaren prozesuari laguntzea eta berrikuntzaren jarduera sustatzea, beti ere, parke, erakunde eta agenteen arteko sinergiak indartuz.
Euskadiko Parke Teknologikoen Sarearen buruzagitza hartuko du honenbestez Jose Miguel Corresek, Arabako Teknologia Parkeak, Bizkaiko Zientzia eta Teknologia Parkeak, Gipuzkoako Zientzia eta Teknologia Parkeak eta Garaia Berrikuntza Guneak osatzen duten sarea, hain zuzen ere.
Egun, 400dik gora enpresa daude lau parke hauetan kokatuta, non 14.400 pertsona inguruk egiten duten lan, eta 3.700 milioi euroko fakturazioa dute, hauetatik %13 I+Gra bideratua, izan ere Euskadiko enpresek I+G arloan egiten duten gastuaren %40 parke teknologikoetan egiten baita.
