GASTEIZ, 20 (EUROPA PRESS)
Eusko Legebiltzarrak Kontzertu Ekonomikoari buruzko Mintegia egingo du ostegunean eta ostiralean, urtarrilaren 21ean eta 22an, hirugarrena interes eta azterketa politikoko gaien inguruan, Ad Concordiam erakundearen laguntzarekin.
Gasteizko Ganberako iturriek jakinarazi dutenez, Kontzertu Ekonomikoa aztertu eta eztabaidatuko dute arlo akademikoko adituek eta une honetan hura garatzeko eta eguneratzeko lanean ari diren arduradun instituzionalek, zuzenbide konparatuaren ikuspegitik oraingoan.
Mintegia ostegunean hasiko da, 09:30ean, Tomas Moro aretoan, Kontzertu Ekonomikoaren aurkezpen teknikoarekin. "Federalismo Fiskala eta Kontzertu Ekonomikoa: zuzenbide konparatutik egindako hurbilketa" izenburupean, Andoni Iturbe Eusko Legebiltzarreko legelariak eta José Rubí Ad Concordiam elkarteko zuzendaritzako kideak hasiko dute mintegia.
Jarraian, mundu akademikoko ordezkariak sakonduko dute Kontzertuaren testuinguru ekonomikoan. Horrela, 09:45ean, Roberto Bernales Deustuko Unibertsitateko Tributuetako Zuzenbideko irakasleak ekingo dio azterketa horri, "Zerga Federalismoa XXI. mendean: gure ingurunearen ikusmolde global bat" hitzaldiarekin.
Halaber, 11:00etan, Julio López Laborda Zaragozako Unibertsitateko Ekonomia Publikoko katedradunaren txanda izango da, "Eredu erkidea eta forala, aurrez aurre jarriak" hitzaldiarekin. Bi ereduak adosteko dauden aukerei buruzko gogoetarekin amaituko du bere jarduna.
Mikel Erkoreka EHUko Historia Garaikideko saileko ikertzaileak bukatuko du mintegiaren lehen eguneko egitaraua, eta gaiari buruzko beste ikuspuntu batzuk ematen hasiko da, "Suitzako zerga-federalismoa Euskal Herriaren ikusmoldetik" izenburuko mintzaldian.
BIGARREN JARDUNALDIA
Ostiralean, jardunaldien bigarren egunean, Gemma Martínez Bizkaiko Foru Aldundiko Zerga Politikaren Zerbitzuko buruak "Hurbilketa AEBetako federalismo fiskaleko ereduaren printzipio eta oinarrietara Kontzertu Ekonomikotik" hitzaldia emango du 09:30etik aurrera.
Jarraian, 10:45ean, James Johnston Eskoziako Parlamentuko aholkulari juridikoaren txanda izango da, eta "Zerga marko berri bat Eskoziarentzat: erronkak eta ikasitako ikasgaiak" gaiaz mintzatuko da. Mintegia amaitzeko, Ricardo Gatzagaetxebarria Eusko Jaurlaritzako Ogasun eta Finantzetako sailburuak hitz egingo du, "Kontzertu Ekonomikoa egun" gaiari buruz.
Gatzagaetxebarriaren agerraldia bukatutakoan, Bakartxo Tejeria Eusko Legebiltzarreko lehendakariak hartuko du hitza, Kontzertu Ekonomikoari buruzko III. Mintegia bukatzeko.
Mintegiaren helburua Kontzertuaren ezagutzan sakonduz joatea da, aurreko bi edizioen ondoren: lehenengoan (2014an) Kontzertuaren historia eta egungo egoera aztertu ziren, eta bigarrenakk (2015ean) Kontzertu Ekonomikoaren egungo eta etorkizuneko erronkak izan zituen ardatz.
Ad Concordiam Kontzertu Ekonomikoa Sustatzeko eta Hedatzeko Elkartea elkarlanean aritu da Eusko Legebiltzarrarekin programa egiteko. Irabazi asmorik gabeko erakundea da, Eusko Legebiltzarrak Elkarteei buruzko otsailaren 12ko 3/1988 Legeak ezarritakoaren babesean sortua. 2000ko azaroaren 16an eratu zen eta bere bazkide sustatzaileak Bizkaiko Foru Aldundia, Euskal Herriko Unibertsitatea (EHU) eta Deustuko Unibertsitatea dira.
Elkartearen helburua fiskalitateari eta ogasun publikoari lotutako gaiak hedatzea eta aztertzea da. Helburu horiek lortzeko, elkarteak zenbait jarduera garatzen ditu: hedatzeko jarduerak, bai herritarrentzat, orokorrean, bai behar edo kezka bereziak dituzten kolektiboentzat; azterlanak eta monografiak, beraiek eginda edo beste batzuei eskatuta; eta ikastaroak mintegiak, erakusketak eta, oro har, jarduera pedagogiko edo dibulgatibo mota guztien antolaketa, elkartearen helburuak diren gai guztiei buruzkoak.
