BILBO, 23 Sep. (EUROPA PRESS) -
Bartzelonako Oberta Unibertsitateak (UOC, katalanezko saigletan) eta Unesco Etxeak Gizarte Erantzukizun Korporatiboko III. Jardunaldia egingo dute urriaren 3an, Bilbon, "GIHek euskal kooperatibismoari egindako balio ekarpena. Ikuspegiak eta gogoetak Euskal Herriko kasutik" izenburupean. Nazio Batuen Erakundearen (NBE) Garapen Iraunkorrerako Helburuak (GIH) lortzeko kooperatibek konponbide indartsuak eta berritzaileak emateko duten gaitasunean egituratuko da topaketa.
Hain zuzen, kooperatibek eta gizarte ekonomiak ekonomia eta ingurumen dinamikak aldatzeko duten garrantzian oinarrituta daude NBEren garapen agendak 2030erako aurreikusi dituen garapen iraunkorreko 17 helburuak, jardunaldien antolakuntzak jakinarazi duenez.
Alderdi horiekin lotuta, kooperatibismoaren munduko aditu, akademiko eta profesionalek gaiaren inguruan dituzten ezagutzak eskainiko dituzte UOC unibertsitateak gizarte erantzukizun korporatiboari dagokionez bultzatzen dituen ekintzen inguruko gogoetarako eta hedapenerako jardunaldian.
Horrela, Alejandro Martinez Berriochoa Eroski Fundazioko zuzendari nagusia txosten nagusiaz arduratuko da, eta ondoren, mahai inguru bat egingo da, Mondragon Unibertsitateko Gizarte Ekonomia eta Enpresa Kooperatiboa Unibertsitate Masterraren koordinatzaile Begoña Arregirekin, Euskalteleko Harreman Instituzionaletarako zuzendari eta Iraunkortasunaren aldeko Euskal Enpresen Elkarteko presidente Nerea Lupardorekin eta Deusto Business Schooleko Senior Research Fellow eta EBENeko (European Business Ethics Network) presidente Jose Luis Retolazarekin. Albert Huerta Aracoopeko Bulego Teknikoko (Kataluniako Generalitatea) eta UOCeren ESK Masterreko irakasleak moderatuko du.
Halaber, Angels Fito UOCeko Ekonomia eta Enpresa Ikasketen zuzendaria eta Guillermo Dorronsoro Unesco Etxeko presidente eta Deusto Business Schooleko dekanoa arduratuko dira aurkezpen instituzionalaz, eta amaiera ekitaldia UOCeko Globalizazio eta Kooperazio errektoreorde Pastora Martínezen ardura izango da.
Jardunaldia urriaren 3an izango da, Bilbon, Yimbi gunean, eta goizeko 08:30etik 11:30era iraungo du. Izen-ematea doakoa da, eta web orri honetan egin daiteke: http://symposium.uoc.edu/event_detail/11310/tickets.html
