BILBO, 4 (EUROPA PRESS)
Kutxabank euskal finantza taldeak eta Bilboko Merkataritza Ganberak lankidetza hitzarmen bat sinatu dute, guztia 85 milioi eurokoa den finantziazio ildo bat zabaltzeko, Bizkaiko enpresa txiki eta ertainen (ETE) nazioarteko merkataritza sustatzeko helburuarekin.
Juan Carlos Landeta Bilboko Merkataritza Ganberako idazkari nagusiak eta Fernando Irigoyen Kutxabanken Handizkako Negozioko zuzendari nagusiaren ondokoak sinatu dute eta, horrenbestez, Bizkaiko ETEek atzerrian duten jarduera inportazioetan zein esportazioetan sustatzeko eta enpreson atzerriko lehiakortasuna hobetzeko bi erakundeek duten konpromisoa berritu dute.
Horrela, Bilboko Merkataritza Ganberak eta Kutxabankek abian jarritako "Exporta +" programaren edizio berriak 50 milioi eurora arteko finantziazio ildoa jarriko du bazkidetutako enpresen eskura, esportazioak finantzatu ditzaten. Gainera, hitzarmenak Inportazioen Finantziaziorako programa ere mantenduko du. Hasieran 20 milioi euroko zuzkidura izango du, baina beste 15 milioi eurora arte ere zabaldu daiteke.
Bilboko Merkataritza Ganberak, bere aldetik, bazkide dituen enpresen eskuetan zerbitzu eskaintza integrala jarriko du nazioartekotze gaietan (dokumentazioa eta aduanetako eskakizunak, merkataritzako aholkularitza, aholkularitza juridikoa, aholkularitza fiskala, deserrirapenak), bai eta 80 merkatutan dituen lankideen sarea ere.
Modu honetan, merkataritza erakundeak eta finantza taldeak Bizkaiko ETEei atzerriko jarduera guztietan laguntza emateko konpromisoari eutsi diote, inportazioetan eta esportazioetan, "atzerriko merkataritza bultzada nabarmena jasotzen ari den testuinguruan", adierazi dutenez.
Horrela islatzen dute Kutxabankek darabiltzan finantziazioko emaitzek. Finantza taldeak 360 milioi euro bideratu zituen iaz atzerriko merkataritzako jarduerak finantzatzera -esportazioak eta inportazioak-, aurreko urtean baino %6,3 gehiago.
Bilakaera positibo horretan, "oso deigarria izan zen esportazioek izan zuten hazkundea". Izan ere, inportazioetarako finantziazioak gorabide egonkorra izan zuen bitartean, esportazioetarako finantziazioa %13 hazi zen.
