DONOSTIA, 15 (EUROPA PRESS)
Fiare Banca Etica erakundeak (Espainiako banku etikoaren bulegoak) eta Laboral Kutxak bi erakundeen arteko esparru hitzarmena izenpetu dute, partekatzen dituzten balioak oinarri hartuta elkarlanean aritzeko, hau da, kooperatibismoa eta kreditua herritarren zerbitzurako ekonomia erreala garatzeko tresna gisara baliatzeko balioak oinarri hartuta. Bi erakundeen iritziz, bada "banka egiteko" beste modu bat: "elkarlanean jardutea eta herritar kontzientziatuen sareak sortzea, ekonomia soziala garatzeko".
Laboral Kutxak jakinarazi duenez, banku etikoaren ordezkaritza bat bere egoitza nagusian bisitan izan da, Arrasaten, Ugo Biggeri presidentea buru zuela, eta bertan sinatu dute hitzarmena. Bi erakundeen arteko harremana 2005ean hasi zen, Fiare proiektua sortu zenean, alegia. Banka etikoari buruz Fiarek duen ikuspegia eta Laboral Kutxaren banka komertzial, kooperatibo eta arduratsuari buruzkoa aldarrikatu dituzte bi erakundeek, eta bat datozela azpimarratu.
Fiare Banca Eticaren eta LABORAL Kutxaren arteko hitzarmenaren arabera, etorkizunean bi erakundeen arteko lankidetza operatiboko zenbait bide jorratzeko aukera zabalik dago. Gaur egun, merkeago atera dezakete eskudirua Laboral Kutxako kutxazainetan Fiareko bezeroek, eta elkarlanean jarduteko beste produktu eta zerbitzu batzuk aztertzen ari dira, besteak beste, ekintzailetza sustatzeko proiektuak bultzatzea, Gaztenpresaz eta antzeko egiturez baliatuta. Halaber, Fiare Banca Etica kooperatibako bazkideek eragiketa gehiago egin ahal izateko Laboral Kutxako bulegoak erabiltzeko aukera aztertzen ari dira.
FINANTZAKETA
Finantzaketari dagokionez, hitzarmenak dio bi erakundeek baterako eragiketak egin ditzaketela, betiere bien interesak bateragarriak diren proiektuetan. Ekintzailetza sustatzea izango dute berariazko helburu baterako finantzaketa horiek, Gaztenpresa Fundazioaren aholkularitza eta laguntza zerbitzuak barne direla.
Banku etikoa eta kooperatiboa da Fiare Banca Etica eta Espainian eta Italian jarduten du. Printzipio berak oinarri dituzten jende eta erakunde askoren konpromisoaren emaitza da erakundea: finantza etikoak, gardentasuna, partaidetza, neurritasuna, eraginkortasuna eta jarduera ekonomikoen ondorio ez ekonomikoekiko ardura. Gaur egun 40.299 bazkide ditu, eta 1.010.436.698 euroko proiektuak finantzatu ditu Espainian eta Italian.
