BILBO, 19 Mar. (EUROPA PRESS) -
Bilboko Udaleko Kultura eta Hezkuntza Sailak Nazioarteko Poesiaren Nazioarteko Eguna ospatuko du datorren ostegunean, martxoaren 21ean, Latinoamerikako poesiatik ibilbide bat proposatuz. Alex Angulo eta Loli Astoreka aktoreek ahotsa jarriko diote Latinoamerikako egileen lan poetikoari, eta musika Jose Urrejola musikari eta konpositorearen esku egongo da.
Ekitaldia Bidebarrieta liburutegiko ekitaldi aretoan izango da, arratsaldeko 19:30etik aurrera. Sarrera librea izango da, aretoko leku guztiak bete arte, Bilboko Udalak jakinarazi duenez.
Alex Angulok 18 urte zituela hasi zuen bere antzezle karrera, Ramon Bareak zuzentzen zuen Karraka antzerki talde independentearekin. Ordutik hainbat egitasmotan egin du lan Ramon Barearekin. 1981ean lehen lana egin zuen zinean, Imanol Uriberen "Segoviako ihesa" filman. Ondoren, ETBko hainbat saiotan aritu zen, baina agertokiak ahaztu gabe, eta 1987an zinemako pantailetara itzuli zen.
1991n, Alex de la Iglesiaren "Mirindas asesinas" film laburraren protagonista izan zen, eta ondoren hainbat aldiz egin zuen lan zinemagile bilbotarrarekin. Lan horien artean daude "El día de la Bestia" (1995) edo"Muertos de risa" (1999); film horiek direla-eta Espainiako zinearen Goya sarietarako izendapena jaso zuen.
Bestalde, Loli Astorekari dagokionez, bere antzezle karrera antzerkian hasi zuen, baina "Goenkale" gisako telebista saioetan egin zen ezaguna. Zinean ere aritu izan da, "Pecata Minuta" (1999), "Pídele cuentas al Rey" (1999), "El coche de pedales" (2004) eta "Aupa Etxebeste!" (2005) lanetan, besteak beste.
Emanaldiaren musika Jose Urrejolak jarriko du. Musikari eta konpositoreak diziplina eta musika tresna esparru zabala lantzen du, hala nola txirula, banbuzko txirulak, whistle, saxo tenorea, saxo altua, saxo sopranoa, ewia, teklatuak eta perkusioa.
Alen (1979-1984) eta Opertura (1984-1986) jazz taldeekin eta Oskorrirekin (1986-2001) aritu da lanean. Zinemarako, antzerkirako eta dantzarako musika ere grabatu du, soka orkestrarako lanak konposatzeaz gain.
