Leioan (Bizkaia) babes ofizialeko 100 etxebizitza esleitzeko prozesua hasi du Jaurlaritzak

BILBO 25 May. (EUROPA PRESS) -

Eusko Jaurlaritzako Etxebizitza Sailak Leioako (Bizkaia) Leioandin babes ofizialeko 100 etxebizitza esleitzeko hautaketa-prozesua hasi du. Azalera eskubidean emango diren etxebizitza horiek Euskadiko Etxebizitza eta Lurra S.A. (VISESA) baltzu publikoak sustatuko ditu, eta zozketa udazkenean egingo da, Jaurlaritzak jakinarazi duenez.

Esleitu beharreko etxebizitzen artean, lau etxebizitza mugikortasun urri iraunkorra duten elbarriei egokitutakoak izango dira. Kupo honetan sartuko dira 2008ko apirilaren 16ko Aginduak, babes ofizialeko etxebizitzak esleitzeko prozedura arautzen duenak, 8. artikuluan aipatzen dituen hiru baremoetatik edozeinen barne daudenak. Baremo ezberdinetan aldi berean parte hartzeko baldintzak betetzen badituzte, aipatu aginduan finkatutako hurrenkeran sartuko dira.

Halaber, 61 etxebizitza gordeko dira izen-ematearen antzinatasuna lau urtetik gorakoa dutenentzat. Antzinatasun edo aldi hori honela zenbatuko da: Etxebiden izena emateko eskariaren datatik Agindu hau argitaratu den egunera arte.

Gainera, beste 29 etxebizitza 25 eta 35 urte bitarteko bizikidez osaturiko bizikidetza-unitateentzat izango dira. Seme-alaben adina ez da kontuan hartuko. Azkenik, sei etxebizitza gordeko dira gainerako eskatzaileentzat.

Eskatzaileek hainbat kupotan aldi berean parte hartzeko baldintzak betetzen badituzte, atal honetan finkatutako lehentasun-hurrenkera jarraituko da.

Etxebiden izena emateko 2011ko azaroaren 30era arte erregistroan sarrera izan duten eskabideak hartuko dira kontuan. Etorkizuneko titularretakoren batek erroldaturik egon beharko du Leioan, etxebizitzen esleipen-prozedurari hasiera ematen dion agindu hau argitaratzen den eguna baino hiru urte lehenagoko antzinatasunez. Baldintza hau Jaurlaritzak eta Leioako Udalak izenpetu zuten hitzarmenean azaltzen da.

Onartutakoen zerrendetan, besteak beste, onartutako eskaera bakoitzari orotara dagokion zenbaki kopurua agertuko da. 2010. urteko zergaldiko diru-sarrera haztatuak 3.000 euro baino txikiagoak ez direla eta 25.000 euro baino handiagoak ez direla egiaztatzea eskatzen da. Mugikortasun urria duten ezgaituak edo ezgaitu psikikoak izanez gero, ez da eskatuko gutxieneko diru-sarrerarik egiaztatzea.

Itxaron-zerrenda agortuz gero, esleitu gabe geratzen diren etxebizitzak, dagokion lurralde ordezkariak zozketa bidez esleituko ditu araudiak ezartzen dituen baldintzak betetzen dituzten eskabideen artean. Posible izango da Etxebiden izena emateko eskabideak kontuan hartuko diren azken eguna atzeratzea eta sustapenean interesa dutela adierazitako udalerriak zabaltzea.