BILBO, 26 (EUROPA PRESS)
Guggenheim Bilbao Museoak zuzeneko musika eta zinema uztartzen dituen jarduera bat hartuko du datozen bi larunbatetan, maiatzaren 27an eta ekainaren 3an. Lumiere anaien eta Georges Meliesen lehen zinema grabazioak proiektatuko dira, Esteban Lahoz eta Peter Pons DJ entzutetsuen doinuekin batera, museo bilbotarretik jakinarazi dutenez.
Horrela, Esteban Lahozen musikak Lumiere anaiek filmatutako 75 klip desberdin baina gehiago lagunduko ditu. DJaren musika elektroniko eta alternatiboko biniloen bildumari esker, hiru gairen arabera taldekatuko dira klipak: familia, egunerokotasuna eta gai industriala.
Bestalde, Peter Ponsek musika jarriko die Georges Meliesen hiru film laburri, hain zuzen, "Les Hallucinations du Baron de Münchausen", "À la Conquête du Pôle" eta "Le Voyage à travers l'Impossible" filmei.
Jarduera hau Guggenheim Bilbao Museoak antolatu eta Vinyl Lovers Films etxeak ekoitzi du, "Paris, mende amaiera: Signac, Redon, Toulouse-Lautrec eta garaikideak" erakusketaren harira. Erakusketa irailaren 17ra bitartean ikusgai dago. Emanaldiak arratsaldeko 19:00etan hasiko dira eta entzungelan izango dira. Saio bakoitzak 45 minutu iraungo du, eta sarrerak lau euro balioko du Museoaren Lagunentzat eta sei euro publiko orokorrarentzat (webgunean eta museoko txarteldegian eskuragarri daude).
