BILBO, 2 (EUROPA PRESS)
Unai Rementeria Bizkaiko ahaldun nagusiak Mikel Urrutikoetxea buruz buruko txapelduna eta mailaz igotzea lortu duten Bilbao Athletic, Arenas, Portugalete eta Gernika futbol taldeetako ordezkariak hartu ditu Foru Jauregian ostegun honetan. Ekitaldian, Zaratamoko pilotariaren eta Bizkaiko lau futbol talde horien "arrakasta ekarri duten baloreak" goraipatu ditu Rementeriak.
Mikel Urrutikoetxea buruz buruko txapela eramandu Bizkaira 38 urteren ostean, pasa den igandean Bizkaia frontoian jokatu zen finalean Aimar Olaizolari irabazi. Gainera, Bilbao Athleticek Bigarren Mailara eta Arenas, Portugalete eta Gernika Bigarren B Mailara igo ziren joan den asteburuan. "Bizkaiko kirolaren arrakastaren isla dira guztiak", esan du ahaldun nagusiak.
Kargua hartu ondoren egin duen lehenengo ekitaldi ofizialean, Rementeriak "bizkaitar guztien etxea" den Bizkaiko Aldundiko ateak ireki ditu kirolariak zoriontzeko, baina batez ere, "Bizkaiko gizartera poza ekarri duen arrakasta lortzea posible egin duten baloreengatik eskerrak emateko eta ospatzeko".
"Esfortzua, ilusioa, talde lana, irmotasuna eta laguntasuna. Horiek dira ospatzeko moduko baloreak", adierazi du Rementeriak, eta balore horiek "kutsatu beharra" dagoela ere esan du. "Bizkaiko Foru Aldundiko gobernu talde berriak ere balore horiek barneratu eta praktikara eraman behar ditu", esan du.
