Naturgas Energiaren hiru proiektu daude gasarekin lotutako ikerketaren Europako sarietarako hamar hautagaien artean

BILBO, 23 (EUROPA PRESS)

   EDP Naturgas Energia aurkezturiko I+G+b arloko hiru proiektu aukeratu dituzte gasarekin lotutako ikerketaren sariak lortzeko lehenengo hamar hautagaien artean.

   Naturgas Energiak aurkeztu dituen eta GERG (European Gas Research Group) taldeko Academic Network Event ekimenaren bosgarren ediziorako hautatuak izan diren I+G+b proiektuak, gasaren esparruko I+G arloan gasaren esparruko enpresa europarrek eta hainbat unibertsitateren ingeniaritza eskolek sinatu dituzten akordioen emaitza dira.

   Europako unibertsitate eta ikerketa-zentroek aurkeztu dituzten 35 I+G lanetatik 22 soilik hautatu dituzte beren kalitateagatik: zortzi Espainiako Estatukoak dira, bost Alemaniakoak, bina Frantzia, Danimarka eta Norvegiakoak, eta bana Belgika, Holanda eta Poloniakoak.

   Naturgas Energiaren hiru proiektu hautatuen artean, bi Naturgasek EHUko Bilboko Ingeniaritza Goi Eskola Teknikoak gas naturalaren inguruko ikerketarekin lotutako lankidetza-proiektuak sustatzeko duen gelakoak dira, eta bestea Nafarroako Unibertsitatea-TECNUNekoa (Donostia) da. Hautatutako proiektuak gas berriztagarriekin daude lotuta; bi biometanoari buruzkoak dira eta hirugarrena hidrogeno gasaren ingurukoa.

   Hirurak daude 2020rako 20/20/20 Estrategia Europarraren barruan, hau da, 2020rako isurtzen den CO2 osoa %20 murrizteko, energia berriztagarriek energiaren ekoizpenean duten parte-hartzea %20 areagotzeko eta energia-eraginkortasuna %20 hobetzeko estrategiaren barruan.

PROIEKTUAK

   Bigarren postuan hautatua izan den proiektua, irabazteko aukera gehien dituena, EHUko proiektu bat da, eta nekazaritza-industriako hondakinen bidez lortutako biogasa gas natural berriztagarri edo biometano bihurtzeko teknologiekin dago lotuta.

   Zortzigarren postuan dagoena, berriz, TECNUNena da, eta bere helburua da biogaseko eta gas naturaleko gas bat aldi berean detektatzea teknika nanoteknologikoen bitartez.

   Azkenik, hamargarren postuan hautatua izan dena EHUrena da, eta metano berriztagarriaren bidez hidrogeno gasa eraginkortasunez ekoizteari eta horrela gas naturaleko sareetan txertatzeari buruzkoa da.

   GERGen ikerketa biltzarraren bosgarren edizioa Parisen egingo da maiatzaren 30ean eta 31n, gas naturalaren industria europarrarekin lotutako ikerketa-zentroen eta unibertsitateen arteko I+G+b gaiekin lotutako harremanak sustatzeko. Biltzarra European Gas Technology Conference (EGATEC) biltzarraren barruan egingo da.

   Gizarte erantzukizun korporatiboko jardueren esparruan, GERG Taldeak aukeratu diren proiektuen tutore eta ikasleen bidaia finantzatzen du. Ekitaldi horretan, GERGek hiru sari ematen dizkie gas naturalarekin lotutako proiekturik onenei.