BILBO, 3 (EUROPA PRESS)
Lan Harremanen Kontseiluaren (LHK) hileko txostenaren arabera, Euskal Autonomia Erkidegoko (EAE) egoera ekonomikoak hobera egin badu ere, negoziazio kolektiboak oraindik ere "erritmo geldoaz" egiten du aurrera eta bitartean laneko gatazkak "nabarmen" igo dira. Horrela, 2017ko lehen bi hiletan greben kopurua %16,7 igo da aurreko urteko aldi beraren aldean.
Igoera horrek lan egin gabeko egunen "gorakada handia" ekarri du, 7.643 izan baitira, 2016ko aldi berean 802 izan ziren bitartean. Honelako gatazketako asko bidean dauden negoziazio kolektiboko prozesuen ondorioz sortu direla jakinarazi du Lan Harremanen Kontseiluak.
Otsailean, Bizkaiko butano banatzaileen sektoreko hitzarmena eta enpresako 19 hitzarmen erregistratu ziren. Hitzarmen horiek guztiek 2.724 langileri ematen diete babesa. EAEn eragina duen estatu eremuan, berriz, 11 hitzarmen erregistratu ziren (sektoreko bost eta enpresako sei), eta eraginpean 5.222 langile hartzen zituzten.
Indarraldi arrunteko hitzarmena duten langileen portzentajea 2017aren hasieran %23 izan da eta %27,4raino igo da. Indarraldia luzaturik duten eta berritzeko zain dauden hitzarmenetako langileen portzentajea, berriz, %51,9 izan da, eta hitzarmena iraungita eta berreskuratzeko zain duten pertsonena %20,7.
Bestalde, otsailean, eraginpean 751 langile hartzen zituzten enplegu erregulazioko 33 espediente jakinarazi zitzaizkion euskal herri administrazioari. Urtea hasi zenetik, guztira, 70 espediente aurkeztu dira, eraginpean 1.052 langile hartuta. Espedienteon eraginpeko biztanleria langileak urte arteko %21 behera egin du 2017ko lehen bi hilabeteetan.
Indarrean dauden hitzarmen kolektiboetako batez besteko soldata igoera %1,33 izan da, nahiz eta hitzarmena eguneratuta daukaten 156.712 langileei bakarrik eragin dien, negoziazio kolektiboaren menpeko biztanleria langilearen %27,4ri, hain zuzen ere.
Azkenik, EAEko KPIren urte arteko igoera %2,9 izan zen otsailean, batez ere produktu energetikoen prezioaren igoera (%16,5) eta prestatu gabeko elikagaiena (%6,5) zirela eta. EAEko KPI orokorra, prestatu gabeko elikagaiak eta produktu energetikoak bazter utzita, %1 izan zen.
