BILBO, 24 (EUROPA PRESS)
Euskal Autonomia Erkidegoan (EAE) pentsioak jasotzen dituzten pertsonen kopurua %1,2 igo da irailean, eta haien batez besteko zenbatekoa 1.101,69 euro da, Espainiako Enplegu eta Gizarte Segurantzako Ministerioak ostegun honetan jakinarazi dituen datuen arabera.
Zehazkiago, joan den irailaren 1ean, 531.391 pentsiodun zeuden EAEn, hau da, 2014ko data berean baino %1,2 gehiago. Herrialdeka, 279.721 pentsiodun Bizkaian bizi dira (%0,9), 180.488 Gipuzkoan (%1,3) eta 71.182 Araban (%2,2).
Halaber, batez besteko pentsioa %2 igo da EAEn urte batean, eta 1.101,69 euroan kokatu da. Herrialdeei dagokienez, zenbateko altuena Arabakoa da, 1.120,66 eurorekin; Bizkaian 1.112,65 euro da zenbatekoa eta Gipuzkoan 1.077,24 euro.
Pentsio gehienak erretiroagatik dira (335.634), batez besteko zenbatekoa 1.267,35 euro izanik. Gainera, ezintasun iraunkorragatiko 42.503 pentsio daude, eta bakoitzak batez beste 1.182,30 euro jasotzen ditu. Alarguntza pentsioak 135.248 dira (batez beste 750,25 euro), zurztasun pentsioak 15.641 (436,31 euro) eta senideen aldekoak 2.365 (641,53 euro).
